Sicela ukulalelwa singabalandeli boSuthu
MHLELI: Ayikho into ebuhlungu njengokungalalelwa uma usho into, kungaba ngeyakhayo noma wumbono ongatheni. Kukaningi sibhala ngokungathokozi ngendlela uCalvin Johson enza ngayo izinto, okuyinto esobala ukuthi kukhona abadlali abayizintandokazi zakhe okufanele badlaliswe ngisho bengekho sezingeni.
Into engikhuluma ngayo wukusayiniswa kwekhehla uJoseph nokulandwa kukaGumede owayedlalela iPlatinum Stars. Baningi abadlali abasayiniswe AmaZulu othi uma ubuka kahle, ubone ukuthi kudlalwa ngemali.
Mina ngingomunye onokufonela emisakazweni eminingi ngiveze imibono yami uma kukhulunywa ngezemidlalo. Kukaningi ngikhala ngendlela AmaZulu enza ngayo izinto kodwa ngibone kahle ukuthi ngiyazihhumela ngoba ngiwumuntukazana.
Ungasho nje ukuthi uMajoro uzokwenzani kuMaZulu? Kungani bengadlaliswa oMhlengiCele? Baphi oSomilia Ntsundwana, angithi baze batshelekiswa? Umtshelekisa kanjani umdlali onjengoNtsundwana ekubeni ewumdlali osemncane okhombisa ukuthi uzoba yinkinga uma edlaliswa?
OPhumlani Gumede ubabona behleli nezihlwele uma uthi uyabuza ungatholi mpendulo kanjalo noMbatha unozinti wokuqina waMaZulu.
Ngiyacabanga ukuthi naye uLunga Sokhela uyakudinga ukuthi abe naye umuntu osemnkantshubomvu olaziyo ibhola, ozomeluleka.
Ngake ngafona kolunye uhlelo oludlala nsuku zonke komunye wemisakazo esakaza ngesilungu ngibalula ukuthi ezinye izinqumo ezithathwa nguJohson zishiya imibuzo eminingi. Umsakazi owayephethe uhlelo wamvikela ngenye indlela, buka-ke manje kwenzekeni? Umbuzo wami kwabe kungukuthi kungani AmaZulu engadlali ngendlela efanayo njengokuthi adle iWits, gwiqiqi uma esededlal neLeopards adlale umswahla webhola?
Yize uJohnson exoshiwe ngoMsombuluko kodwa bekumele baqashe umuntu osezingeni lakhe obezomsiza ngoba kwesinye isikhathi uyabona ukuthi ubesephelelwe yimibono ekubeni le ndoda ebimsiza beyizihlalela izithulele. Siyafisa ukulalelwa singabantu abalithandayo ibhola nabathanda iqembu AmaZulu. Siyafisa ukubona iqembu libuyelwa wudumo, lidlondlobale njengamanye. Mduduzi Mzokhona Gcabashe EMKHAMBATHINI