Uthemba ukuqopha umlando kwiDowns
UJIKE ebusweni ngesikhathi eqaphela ukuthi iMamelodi Sundowns ayinawo umlando wokukhuphula unozinti esuka ezinkulisa zayo aze ayokhonya esikimini esikhulu uKhulekani Kubheka (20) oyinxusa leCOPA Coca Cola ka-Under 15, imidlalo yayo yamanqamu eqala namuhla eKing Zwelithini Stadium, eMlaza.
Izikole eziyisishiyagalolunye ezivela ezifundazweni zitheleke izolo eThekwini ukuzolwela ithuba lokubizwa ngompetha balo mqhudelwano okuvele kuwona uHappy Jele, Mandla Masango no-Andile Jali nabanye abaningi. Abaxhasi bawenza ngokuhlanganyela neSasfa ebheke ibhola lezikole.
UKubheka, odle isicoco seCOPA Coca Cola neClapham High School yasePitoli ngo-2014, uqale ibhola ezinkulisa zeBidvest Wits ngaphambi kokubonwa kulo mqhudelwano okumvulele isikhundla kwiSundowns. Ike yambolekisa kwiCape Umoya edlala kwiGladAfrica Championship, yambuyisa kule sizini.
Ngisho ngabe uyathanda indaba yakhe kwiSundowns isazothatha isikhathi uma uzokhumbula ukuthi onozinti abafana noKennedy Mweene noRiyaad Pieterse abavimbela amazwe abo esizwe basizwa ngendaba isikimu esisezandleni zikaDenis Onyango.
Muva nje, iSundowns isanda kusayinisa uJody February obekwi-Ajax Cape Town kodwa yamdlulisela kwiCape Umoya kuze kuphele isizini.
“Bengingakaze nginake ukuthi iDowns ayinawo umlando omuhle ngonozinti abancane. Akungethusi. Kodwa kuyangimangaza. Uma ngigcina ngiba unozinti wokuqina weSundowns kuyongenza ngizizwe ngihloniphekile. Sengiseduze.
Nginephupho ngeChampions League yeCAF nangokudlulela phesheya kwezilwandle,” usho kanje.
Omunye wasebeneminyaka behlwaya ikhono ocele ukungakhulumi ngokusemthethweni, uthe nomqhudelwano uqobo awunawo umlando omuhle ekukhiqizeni onozinti.
“Ukhona unozinti engimkhumbulayo ovimbela elinye lamaqembu ePSL aseKZN. Inkinga ukuthi igama nesibongo ayedlala ngakho ngesikhathi simkhetha sekwashintsha kokubili, manje kunzima,” usho kanje ebaleka.
UKubheka waseGermiston, eGoli, uthe kwakhona lokho kuzomkhukhumeza ngoba ukholwa ukuthi kungenzeka ukuthi wuyena ozokuba isibonelo, kuvele nabanye abaningi ngemuva kwakhe.
Lo nozinti usewadlalele wonke amaqembu esizwe amancane kusukela kwi-Under 17 kuze kufike kwi-Under 23. Nyakenye, uphakamise indebe yeCosafa Under 20 ehola izwe engukaputeni.
UKubheka wenza unyaka wesibili ezifundweni zeTransport and Logistics Management e-University of South Africa. Usonge ngokuthi abongele isikole esizowina ngoba zonke kuzifanele ukudla isicoco noR80 000 bese kuthi isibili nesithathu bagoduke noR30 000 noR25 000 ngokulandelana.