Azolubuyisa udumo lwakudala AmaBhokobhoko?

KUNGENZEKA yini ukuthi usuku lwangoMgqibelo kube yilona oluyohlale lukhunjulwa njengokwaqala ngalo indlela yamaBhokobhoko ebheke ekubuyiseni udumo lwango-1995 nango-2007 ngokuthi acoboshise izimbangi zawo ezinkulu iNew Zealand kowokuvula iNdebe yoMhlaba eseJapan?

Umdlalo ka-Pool B useYokohama Stadium ngo-11.45 ekuseni. KwiNdebe yoMhlaba edlule ebise-England ngo-2015, amaBhokobhoko ahambe enesigcwagcwa kwabebala elimnyama. Lokhu bekudalwa yindlela obengumqeqeshi, uHeyneke Meyer, abeziba ngayo abadlali bebala elimnyama yize bebenza kahle.

Lokhu kuze kwadala obengungqongqoshe wezeMidlalo ngaleso sikhathi, uFikile Mbalula, washaya umthetho wokuthi ngokuqala kweNdebe yoMhlaba ka-2019, kufanele babe sebandile abadlali bebala elimnyama eqenjini lesizwe. Umbhoxo ngeminye yemidlalo ekhule ngesikhulu isivinini kwabebala elimnyama ngokuhlabana kwamaBhokobhoko ngo-1995 nango2007.

Umqhudelwano uqala ngomdlalo onzima namaAll Blacks. Imiphumela yakamuva ikhomba ukuthi igebe ebelikhona phakathi kwamaBhokobhoko naleli qembu elivikela isicoco selinciphe ngendlela eyisimanga. Lokhu kungumsebenzi kaRassie Erusmus awenze kumasizini amabili adlule. Kulama sizini kubuye uthando lwamaBhokobhoko nakwabebala elimnyama. Lokhu ukubuyise ngemiphumela nokunika uSiya Kolisi ibhande lobukaputeni. Ngaphandle kwalokhu ulande uMzwandile Stick ukuba azomeseka wase ekhulisa nabadlali abafana noMakazole Mapimpi, Lukhanyo Am, S’bu Nkosi nabanye abaningi okukhona kubona noTrevor Nayakane.

Izigagayi azoqala ngazo lindlela ebheke ekubuyiseni uthando lwamaBhokobhoko esizweni, u-Erasmus, uzithake kanje:

Willie le Roux, Cheslin Kolbe, Lukhanyo Am, Damian de Allende, Makazole Mapimpi, Handré Pollard, Faf de Klerk, Duane Vermeulen, Pieter-Steph du Toit, Siya Kolisi

(ukaputeni), Franco Mostert, Eben Etzebeth, Frans Malherbe, Malcolm Marx noSteven Kitshoff. Ebhentshini: Bongi Mbonambi, Tendai Mtawarira, Trevor Nyakane, RG Snyman, Francois Louw, Herschel Jantjies, Frans Steyn noJesse Kriel.