‘IChiefs ngeke isinqobe isicoco okwamanje’
MAPHAPHU phansi kubalandeli beKaizer Chiefs, mancane amathuba okuthi leli qembu linqobe isicoco kule sizini.’
Lokhu kushiwo uJabulani Mendu odlalele Amakhosi neMoroka Swallows eminyakeni edlule, njengoba engumhloli wekhono emqhudelwaneni iCopa Coca-Cola National Finals.
Lo mqhudelwano uzodlalelwa eKing Zwelithini Stadium, eMlaza, kusuka namuhla uze usongwe ngoMgqibelo.
UMendu utshele izintatheli ngesikhathi ehambele ukwethulwa kwalo mqhudelwano ngoLwesibili, eThekwini, ukuthi kuwumqansa ongakhwelwa mbongolo kulaba badlali abadlalela iChiefs njengamanje ukuthi banqobe isicoco ngoba kwabona kababona abanqobi uma ubuka imvelaphi yabo.
Ukhuluma lezi zindaba nje uMendu, sekuphele amasizini amahlanu iChiefs yagcina ukunqoba isicoco, nokuyinto esibami emphinjeni abalandeli baleli qembu elithathwa njengelikhulukazi eNingizimu Afrika. Ezika-Ernst “Mazinyo” Middendorp ziphinde zazifaka ehlazweni zehluleka ukungena kwiTop 8 ngesizini edlule.
“Njengamanje iChiefs, ngokwami ukubuka, iyiqembu elisakha elingakahlangani. Umbono wami ukuthi eqenjini elikhulu njengeChiefs, asikho isikhathi sokwakha, kufanele uthenge abadlali abakujwayele ukunqoba izicoco, kwaphela. Ngakho abaphathi beChiefs bekufanele besayinise abadlali abakwazi ukunqoba izicoco,” uqale kanje uMendu.
“Akubona bonke abantu abanganqobi, kufanele bathole abadlali abangabanqobi, abanomthambo wokunqoba. Kufuneka abadlali abanesipiliyoni, abaziyo ukuthi yini elindelekile kubona. Umbuzo nje, bangaki abadlali abagijimela iChiefs njengamanje asebeke banqoba okuthile ngaphambi kokujoyina iChiefs? Kodwa futhi abalandeli balindele ukuthi bazothola izicoco,” kuqhuba uMendu. Njengamanje Amakhosi yiwona aqhwakele kwi-log ye-Absa Premiership ngamaphuzu ayishumi, emidlalweni emihlanu. “Ngakho asibanikeni ithuba lokwakha, seseke nomqeqeshi uMiddendorp ngoba muhle umsebenzi awenzayo,” usho kanje uMendu. IMIDLALO YE-ABSA PREMIERSHIP: NgoMgqibelo: