Bashaqekile befica isikole sabo sivutha
BAKHUNGATHEKILE abafundi nothisha baKwaGiba High, eHluhluwe, befica isikole sabo sivutha izolo ekuseni.
Abazali bezingane ezifunda KwaGiba High abakhulume neSolezwe kodwa bacela ukungadalulwa bathe kabazi ukuthi isikole sishiswe wobani kodwa bekunezinkinga eziholele ekutheni kulethwe uthishomkhulu omusha ophuma kwesinye isikole.
Isolezwe lithole ukuthi uthishomkhulu obephethe KwaGiba ubesolwa ngokungayiphathi kahle imali yesikole nokuhlulwa ngabafundi abadla izidakamizwa udede.
Ube eseshintshwa nozakwabo waseSiphondweni High naye obephenywa ngoba esolwa ngokuthandana nothisha abathathu besikole sakhe, obekuthi uma elovile nabo balove bangaqondiswa nobugwegwe.
Kuthiwa uthishomkhulu obephuma eSiphondweni ubezithwele engafuni ukusebenza KwaGiba esho nokuthi yena uneziqu zobudokotela, ngakho ulindele ukwenziwa umhloli hhayi ukusebenza kulesi sikole.
Kusolakala ukuthi nomsebenzi ubengawenzi, into ecasule umphakathi.
“Okusiphatha kabi wukuthi sekuzobhalwa izivivinyo zokuphela konyaka, asazi izingane zethu zizobhalela kuphi njengoba kushiswe isikole. Ngeke siqagele ukuthi isikole sishiswe wubani ngoba sivuke kusha namhlanje (izolo). Sesithembe amaphoyisa ukuthi yiwona azobamba oshisile emuva kophenyo lwawo,” kusho omunye umzali.
UMnuz Muzi Mahlambi, obhekelele ezokuxhumana eMnyangweni wezeMfundo KwaZulu-Natal, uthe kuyishwa ukuthi uma kukhona izinto umphakathi onganeme ngazo bese ushisa isikole.
“SiwuMnyango kusiphethe kabi ukuthi umphakathi ushise isikole ngoba sesibhekene nesimo lapho kufanele sitholele izingane indawo yokubhala njengoba kubhalwa izivivinyo zokuphela konyaka nezikamatric. Lokhu kuzophazamisa abafundi ngoba kufanele bayobhala kwenye indawo izivivinyo zokuphela konyaka. Bazophazamiseka nasemqondweni. Siwumnyango sizokwenza konke okusemandleni ukuqinisekisa ukuthi abafundi bazibhala kahle izivivinyo,” kusho uMahlambi.
ULt-Colonel Thulani Zwane wamaphoyisa KwaZulu-Natal ukuqinisekisile ukuthi kunesikole esishile eHluhluwe.
“Amaphoyisa aseHluhluwe aphenya icala lokushiswa kwempahla kodwa akekho obeseboshiwe. Akwaziwa ukuthi umlilo uqalwe yini,” kusho uZwane.