Luzogujwa minyaka yonke usuku lwabama-ambulensi
ITHEKU lihamba phambili ngezigameko zokuhlaselwa kwabasebenza kumaambulensi abasuke besendleleni beyosiza iziguli ezidinga usizo oluphuthumayo.
Lokhu kushiwo wuNgqongqoshe wezeMpilo KwaZulu-Natal uNkk Nomagugu Simelane -Zulu, izolo, eThekwini ngesikhathi kwethulwa ngokusemthethweni usuku lokuqhakambisa umsebenzi owenziwa ngabasebenzi abasebenza kuma-ambulensi, kwethulwa nenombolo entsha eshayelwayo uma kudingeka i-ambulensi kanye nomfaniswano omusha.
UNkk Simelane -Zulu uthe abashayela amaamabulensi eThekwini, abaphephile, izimoto abahamba ngazo ziyadunwa, babanjwa inkunzi, bashaywe.
“Ngenhlanhla okwamanje akekho umsebenzi oseke washona esigamekweni sokuduna imoto. Esikuqaphelayo ukuthi nakuba nakwezinye izindawo uyenzeka lo mkhuba kodwa eThekwini udlange kakhulu. Njengamanje sinohlelo lokunxenxa amaphoyisa, amakhansela nomphakathi ukuthi usebenzisane nathi ukuze umphakathi osuke udinga ama-ambulensi ungabi nenkinga,” kusho yena.
UNgqongqoshe wezeMpilo kuleli uDkt Zweli Mkhize uthe abasebenza kuma-ambulensi benza umsebenzi obalulekile esizweni njengoba kuyibona abafika kuqala bezohlenga abalimele babanike usizo lokuqala bese bebadlulisela ezikhungweni zezempilo.
Ngesikhathi benza lokhu nabo bazibeka engozini ngoba kwezinye izigameko abasuke bebizwe kuzo kusuke kunobungozi.
“Kubalulekile ukuthi kube nosuku lokuqhakambisa umsebenzi ohambisana nokuzinikela abakwenzayo behlenga abantu. Kusukela namhlanje lolu suku seluzokwaziwa ngeNational Emergency Medical Service Day luzogujwa yonke iminyaka,” kusho yena.
Uthe ukushintshwa kwenombolo 10777 ebisetshenziswa phambilini kushintshelwa ku-112 kwenzelwe ukuthi inombolo esetshenziswayo ibe lula.
Uqhube wathi akumele kube nezindawo okuzothiwa abama-ambulensi awangeni kuzo noma kuthiwa baphelezelwa ngamaphoyisa uma beya kuzo.
“Uma siyekela isimo sokuthi abasebenzi bahlukunyezwe uma beye ezindaweni ezithile kuzoba nezindawo abasebenzi abazogcina sebesaba ukuya kuzo, nathi ngeke sikwazi ukuphoqa abasebenzi ukuthi baqhubeke baye kulezo zindawo . Asikwazi ukuthi sithembele ekutheni amaphoyisa yiwo azophelezela ama-ambulensi. Kuzokwenziwa njani uma ingekho iveni,” kubuza uMkhize.
UNkk SimelaneZulu uthe njengamanje basezinhlelweni zokuthi bathenge izimoto ezintsha ezizofakwa izinsiza ezisezingeni eliphezulu kodwa lokho uyazi ukuthi kuzobafakela ingcindezi yokuthi izigebengu eziduna amaambulensi zibahlasele kakhulu abasebenzi ngoba zibona ukuthi sekunohlobo olusha lwezimoto,” kusho yena.