Bacikeke basaphaza indle kwamasipala
BATHUKUTHELE bachitha indle emahhovisi kaMasipala weTheku abasebenzi abebekhala ngokuthi sekuphele izinyanga eziyisithupha bengaholelwa.
Laba basebenzi bezinkampani ezizimele kuma ward ehlukene eThekwini, bakhala ngokwenziwa izigqila wumkhandlu.
Amaphoyisa abophe abasebenzi abebesolwa ngokuba seqhulwini ngokusaphaza indle nokucekela phansi impahla emahhovisi ophikweni lwezaManzi nokuThuthwa kweNdle asedolobheni.
UMnuz Bheki Nyawose waseMlaza, ongumsebenzi, uthe kusukela ngoMeyi nonyaka bamoma amathoyilethe omgodi ngale kweholo.
“Kusukela siqala umsebenzi, umasipala uthi sizohola emuva kwamasonto amabili. Sifuna ukukhokhelwa manje, bathi sidlani ngoba bengasiholele ekubeni bona behola nyanga zonke,”kubalisa uNyawose.
Uzakwabo kaNyawose, uMnuz Ndumiso Ngcobo, uthe kuphoqeleke ukuthi bazobhikisha bachithe nendle ukuze bathumele umyalezo oshubile kwiziphathimandla zophiko lwezamanzi nezendle.
“Sesenziwe izilima kwanele manje. Sifuna imali yethu manje ngale kwalokho sizoqhubeka nokusaphaza indle,” kusho uNgcobo.
Usonkontileka, ongathandanga kudalulwe igama lakhe ngenxa yokusaba ukuhlukunyezwa wumkhandlu, uthe bacwile shi ezikweletini futhi nabasebenzi babahleli emahlombe, bafuna ukuholelwa.
“Saboleka izimali, sakha amathoyilethi ashaywayo ezikoleni, simoma nawomgodi kodwa asikhokhelwe. Abasebenzi baxabana nathi bafuna inkokhelo,” kubalisa usonkontileka. Okhulumela uMasipala weTheku, uMnuz Msawakhe Mayisela, uyigxekile indlela yokuziphatha ebinodlame olwenziwe ngabasebenzi.
Ube eseshayela ihlombe ukushesha kwamaphoyisa abophe abasolwa abayisikhombisa.
“Kusolakala ukuthi inkinga imayelana nokungakhokhelani phakathi kwenkampani enkulu iVIP Toilets nezinye ezincane esebenzisana nazo.
Izinkampani ezincane ziveze ilaka lazo ngokuthi zigasela emahhovisi omkhandlu zadala umonakalo,” kusho uMayisela.
UMayisela uthe umasipala wenza uphenyo ngezinsolo ezenziwe osonkontileka.
Okhulumela amaphoyisa esifundazweni, uCaptain Nqobile Gwala, usiqinisekisile isigameko sokuboshwa kwabasolwa abayisikhombisa, abaneminyaka ephakathi kuka27 no-36.
UGwala uthe abasolwa kulindeleke ukuthi bavele enkantolo namhlanje ngecala lokususa udlame emphakathini.