URamaphosa uxwayisa abafuna umsebenzi ngodli
UMENGAMELI Cyril Ramaphosa uxwayise izolo ngokuthi bazobhekana nosomabhizinisi abahamba bemisa izinhlelo zentuthuko, basabise ngokuthi bona basondelene nosopolitiki abaphezulu.
Ekhuluma emcimbini obuhlelwe yiDurban Chamber of Commerce e-ICC eThekwini lapho izikhulu zikahulumeni bezihlangene nosomabhizinisi, uRamaphosa uthe kumele kube khona umnyakazo owenziwayo ukuze kuqedwe lesi sihlava.
“Abanye balabo somabhizinisi bamise ukwakhiwa kwebhuluho e-Eastern Cape. Nakwezinye izindawo siyayithola imibiko yokumiswa kwezinhlelo zentuthuko ngabantu abasuke befuna umsebenzi ngenkani,” kusho uRamaphosa.
Ukhale ngabantu abadla umhlaba okungesiwo owabo, wathi nabo kumele bathathelwe izinyathelo.
“Asikwazi ukuthula sisonge izandla sibe sibona abantu bephendula izwe lethu indawo engenamthetho,” kusho uRamaphosa.
Ukhiphe isexwayiso ezikhulwini zomasipala ezingabakhokheli osonkontileka ngaphandle kwesizathu.
Uthe izikhulu ezenza lokho kumele zithathelwa izinyathelo, kugcine sekushayeka namaphakethe azo.
“Enye into eyinkinga kuleli yindaba yokushiswa kwamaloli. Ngihlanganile noNgqongqoshe wamaPhoyisa, uMnuz Bheki Cele salubheka lolu daba, saqhamuka nesu lokuqeda lesi sihlava,” kusho umengameli.
Uphethe inkulumo ngokuphonsela inselelo osomabhizinisi, wathi kumele basebenzisane nabo ukuze bangasali ngaphandle ezinhlelweni ezikhona.
Osomabhizinisi abaningi baphakamise ukuthi ikomkhulu lamahhovisi akwaTransnet libuyiselwe KwaZulu-Natal ngoba kukhona amachweba amaningi.
NoNdunankulu waKwaZuluNatal, uMnuz Sihle Zikalala uthe uyavumelana nesiphakamiso sikaMnuz Moses Tembe ukuba amahhovisi amakhulu akwaTransnet alethwe eKZN.
UZikalala uzwakalise ukukhathazeka ngokuthi izinkampani ezinkulu azizibophezeli ngokwanele ekusizeni amabhizinisi asafufusa.
UNgqongqoshe wezoHwebo neziMboni, uMnuz Ibrahim Patel, uthe uNgqongqoshe wezamaBhizinisi kaHulumeni uMnuz Pravin Gordhan, uzohambela eThekwini lapho ezohlangana nosomabhizinisi ezinsukwini ezizayo kuzobhungwa ngezinkinga ezikhungethe ichweba nezinye.