UMabuza uxolisile ngokucinywa kukagesi
IPHINI likaMengameli, uMnuz David Mabuza, selixolisele uhulumeni ngokucishwa kukagesi kuleli okwenziwa i-Eskom.
Ephendula imibuzo izolo ePhalamende eKapa, uMabuza, uthe basabheka ukuxazulula isimo. Amaqembu aphikisayo abuze ngokucishwa kukagesi, ukwesekwa kwabamabhizinisi nokusungulwa kwamathuba emisebenzi.
“Empeleni ngasohlangothini likahulumeni sithanda ukuxolisa kubantu bakuleli ngokucinywa kukagesi. Siyaxolisa kubafundi abaphazamisekile bebhala izivivinyo, siyaxolisa kosomabhizinisi. Izinkinga zonke ezidalekile ngenxa yokucinywa kukagesi. Kumanje siyabheka ukuthi siyixazulula kanjani le nkinga.”
Uthe lokhu kucinywa kukagesi kudalwe kakhulu ukuthi sekuneziteshi zakwaEskom esezigugile ezidinga ukulungiswa.
Odabeni lokwakha amathuba emisebenzi, uthe uMengameli Cyril Ramaphosa, uyaqinisekisa ukuthi uhlangana njalo nabamabhizinisi neminyango ethintekayo ukuthola ukuthi izincomo ezavela kwingqungquthela yezemisebenzi i-Job Summit, ziyalandelwa.
Uthe basebenza kanzima ukuqinisekisa ukuthi umnotho uyakhula, ngokusebenzisana nosomabhizinisi.
“Sisungule umnyango ukuba ubhekele izindaba ezithinta amabhizinisi amancane. Sibheke manje ukuba kusungulwe isikhwama esizoxhasa osomabhizinisi,” kusho uMabuza.
Odabeni oluthinta umnikelo owatholwa nguRamaphosa wokuxhasa umkhankaso wakhe wokuhola i-ANC, uthe abantu abanikelela uMengameli akukho abakwenza okonakele wathi lolu wudaba lwe-ANC.
UMabuza uphinde wakubeka kacaca ukuthi benguhulumeni ngeke bakubekezelele ukubulawa nokuhlukunyezwa kwabesifazane kuleli.
“Ukuhlukunyezwa kwabesifazane kumayelana nesimo somqondo wesizwe, kumele senze isiqiniseko sokuthi umthetho wakuleli uyabavikela abesifazane nezingane. Lokhu kusuka endleleni esiphatha ngayo amantombazane emakhaya, kumele siwakhulise ngendlela efanayo nabafana.”
Uthe ukuhlukanisa imisebenzi ngokobulili kumele kuphele.
Khonamanjalo uSihlalo wakwa-Eskom, uMnuz Jabu Mabuza, uthe namhlanje wusuku lokugcina lokucinywa kukagesi wathembisa ukuthi isimo sizobuyela kwesejwayalekile.