Ihlombe kugwetshwa umdlwenguli
BASHAYE ihlombe, bacula bejabule abebehambele icala ngesikhathi egwetshwa udilikajele owadlwengula ingane eneminyaka eyisikhombisa, uNicholas Ninow.
Ngesikhathi ijaji Papi Mosopa lethula isigwebo enkantolo iNorth Gauteng eGoli, umphakathi usukume washaya ihlombe wacula utshengisa ukwamukela isigwebo.
UNinow ugwetshwe udilikajele ngecala lokudlwengula neminyaka emihlanu ngecala lokutholwa nezidakamizwa nokuphazamisa ukusebenza komthetho.
Igama lakhe lizofakwa nasohlwini lwabantu okungamele baphinde basebenze nezingane. Okhulumela uphiko lwezokushushisa, u-Adv Phindi Mjonondwana, ekhuluma ne-eNCA uthe basijabulele kakhulu isigwebo.
“Kuyasigculisa ukuthi izinkantolo zethu zikuveza obala ukuthi ngeke zibabekezelele abantu abahlukumeza izingane nabesifazane, zizobajezisa ngendlela. Sifuna nabanye bafunde kulokhu ukuze bangaphindi benze amacala afuze lawa.”
UMosopa uthe ukuzwile futhi uyakuqonda ukuthi usemncane ngokweminyaka uNinow nokuthi unengane encane kodwa wathi uhlulekile ukuveza ukuthi uyazisola ngokugcwele ngakwenza.
Uthe isenzo sakhe senza impilo yomndeni wale ntombazanyana ibe nzima, ifane nesihogo uqobo.
Ijaji lithe yize umdlwenguli esebenzise izidakamizwa kusukela eneminyaka engu-13 ayezinikezwa wunina, nokuhlukunyezwa ngokocansi eseyingane, lokhu bekungamele kumenze enze leli cala.
Ngaphambi kokuba agwetshwe, usonhlalakahle uCaptain Karin Botha, uthule ubufakazi enkantolo ngokuhlukumezeka komndeni kulandela lesi sigameko. Utshele inkantolo ukuthi intombazanyana eyadlwengulwa, ithi njalo ebusuku iyabubona ubuso balo mdlwenguli.
Yize sekudlule isikhathi njengoba yadlwengulwa ngo-2018 endaweni yokudla e-Dros, eSilverton, ePitoli kodwa umndeni uthe uphila kanzima.