Umlando kwethulwa iselula yokuqala kuleli
KUQOPHEKE umlando izolo ngesikhathi kwethulwa ngokusemthethweni iselula yokuqala ukwakhiwa eNingizimu Afrika eyaziwa ngeMara Phone.
Le selula esezingeni eliphezulu yesimanje yakhiwe ngabafundi abenza izifundo zobunjiniyela efemini yokwakha amafoni eDube Tradeport eThekwini.
Ukwakhiwa nokukhiqizwa kwayo eThekwini kuzokwenza ukuthi iNingizimu Afrika ikwazi ukuncintisana namazwe amakhulu akhiqiza amaselula, okuyiKorea eyenza iSamsung, iChina eyenza iHuawei ne-USA eyenza i-iPhone.
Ethula inkulumo yakhe emcimbini uMengameli Cyril Ramaphosa uthe kuyintokozo kuyena ukuthi abe seDube Tradeport azozibonela ukwethulwa ngokusemthethweni kweselula eyakhiwe eNingizimu Afrika, okuzosiza izwe ukuze libalwe namanye amazwe ahamba phambili emhlabeni ekukhiqizeni ezobuchwepheshe.
“Ngesikhathi ngethula inkulumo yesizwe ngakugcizelela ukuthi izizinda zokuthuthukisa umnotho zibalulekile ekufukuleni umnotho wezwe nokuheha abatshalizimali,” kusho uRamaphosa.
Uthe amazwe amaningi athuthukile emhlabeni afana noChina aqala ngokwakha izizinda zawo zokuthuthukisa umnotho.
URamaphosa uthe esembuthanweni wosomabhizinisi nyakenye kwenziwa izimemezelo eziningi, esinye sazo yilesi esithokozelwayo namhlanje (izolo) esenziwa yisikhulu esiphezulu seMara Group, uMnuz Ashish Thakkar owathi ufuna ukukhiqiza iselula ezokwakhiwa eNingizimu Afrika.
“U-Ashish (Thakkar) wathi ufuna ukwenza izwekazi i-Afrika lihlonipheke. Ngiyathokoza ukuthi namhlanje iphupho lakhe lifezekile,” kusho uRamaphosa.
Uthe esekhuluma ngesifiso sikaThakkar abanye babecabanga ukuthi uyaziphuphela.
UThakkar uthe namhlanje kuyafakazeleka ukuthi abantu base-Afrika bayaphupha bese beyenza.
“Namhlanje kuqopheka umlando, iphupho leNingizimu Afrika neMara lifezekile. Ngonyaka odlule senze isithembiso embuthanweni wosomabhizinisi, sathi sifuna ukukhiqiza iselula lapha ezweni. Namhlanje siyajabula ngoba isithembiso sethu sifezekile,” kusho uThakkar.
Uthe inkampani yabo iqashe abantu abasha abangu-200.
URamaphosa uveze ukuthi kuyimanje babheke ekutheni kuqale uhlelo lwesigaba sesibili seDube Tradeport.
Uthe isigaba sesibili seTradeport sizogxila kakhulu ebuxhakaxhakeni bukagesi nomkhakha ohlanganisa amabhanoyi.
“Ukuthuthukiswa kweDube Tradeport akuzosiza kuphela isifundazwe iKwaZulu-Natal kodwa kuzosiza iNingizimu Afrika nezwekazi i-Afrika. Kumanje iTradeport kuno-R3.2 billion, ofakwa ngabatshalizimali abazimele, kwadaleka namathuba emisebenzi angu-12 000, esigabeni sokuqala seDube Tradeport,” kusho uRamaphosa.