Kubuyiswa ithemba ezinganeni
KUNGUMSEBENZI wabazali, uhulumeni, osomabhizinisi nabezinhlangano ezingenzi nzuzo ukuqinisekisa ukuthi izingane zidla ukudla okunezakhamzimba, ukuze zikhule zinempilo.
Lokhu kushiwo nguNgqongqoshe wezokuThuthukiswa koMphakathi kuzwelonke uNksz Lindiwe Zulu, emcimbini wokubuyisa ithemba ngokulwa nendlala ezinganeni obizwa ngeState of Hope Address ohlelwe yinhlangano yesitolo senyama yenkukhu, iKFC Add Hope Foundation njengoba kuyinyanga yokulwa nendlala umhlaba wonke. Lo mcimbi ubuse-University of KwaZulu-Natal eWestville, izolo.
“Njengohulumeni, abazali kanjalo nabezinhlangano ezingenzi nzuzo, kumele sazi ukuthi ukulamba kwengane kusho ukuhlukumezeka kwelungelo layo njengoba kuyilungelo layo ukuthi idle ukudla okunezakhamzimba,” kusho uNksz Zulu.
Ubonge le nhlangano ngokubamba iqhaza elibonakalayo ekulweni nendlala.
I-KFC iqale lolu hlelo lokuqoqwa kwemali kubathengi ukuze kubhekelelwe izingane eziphuma emindenini ekhahlanyezwe yinhlupheko eminyakeni engu-10 edlule.
OyiGeneral Manager kwaKFC, uMnuz Tarun Lal, uthe ngemadlana engango-R2 enikelwa amalungu omphakathi uma ethenga ezitolo zabo, sebenze umehluko ezinganeni ezingu-450 KwaZulu-Natal ngamapuleti okudla angu- 22 000 ngosuku.
“Sizizwa sithobeke kakhulu ngokuba yingxenye yokulwa nendlala ezinganeni nokubuyisa ithemba kuzona. Sizoqhubeka nokusebenzisana nabezinhlangano ezingenzi nzuzo, osomabhizinisi nomphakathi ukuqinisekisa ukuthi siyalwa nokulamba kwezingane ikakhulu lezo ezizithola zikhahlanyezwe yinhlupheko,” kusho uLal.
Uthe basebenzisana nezinhlangano ezingenzi nzuzo ezingu-144 kanti uma kuqokwa inhlangano egcina ihlomula kulolu hlelo, uthe banesigungu okuyiso esicwaninga ngezinhlangano ezingenzi nzuzo, bese siqoka inhlangano okumele izuze kulolu hlelo kuncike nasekutheni ikhona yini ngaphansi kohlu lwezinhlangano ezingenzi nzuzo ezibhalisiwe ngaphansi koMnyango wezokuThuthukiswa koMphakathi.
UXolani Poto (10) no-Ayanda Shezi (10), abangamanxusa alesi sitolo ekugqugquzeleni ukuqoqwa kwemali yokulwa nendlala, bebeyingxenye yalo mcimbi.
Ekhuluma nezethameli ebezithamele lo mcimbi uXolani, uthe wonke umuntu kumele abe nendima ayiklamayo ukuqinisekisa ukuthi izingane zidla ukudla okunomsoco.
“Sifuna ukuphila ezweni lapho izingane zingalambi. Iningi lezingane emhlabeni liyagula ngenxa yokungadli ngendlela nangenxa yokudla ukudla okungenamsoco,” kusho uXolani.
Kulo mcimbi kunandise uDuncan, Proverb noKhaya.