Okukhathaza uMotshekga ngo-matric ozobhala
IMIBHIKISHO yokukhala ngezidingo egcina isiba nodlame ngenye yezinto engakhinyabeza ukubhala kwabafundi njengoba ingenza kube nzima ukuthi abafundi bafinyelele ezikhungweni ababhalela kuzona.
Lokhu kushiwo nguNgqongqoshe weMfundo eyiSisekelo, uNkk Angie Motshekga, obesesikoleni samabanga aphansi iGlenmore, eThekwini izolo ngenhloso yokuzothulela abezindaba ngokuphothula komnyango wakhe amalungiselelo okubhekana nokubhalwa kwezivivinyo zokuphela konyaka.
“Sinxusa amalungu omphakathi ukuthi aziqhelise nalesi senzo abafundi baze baphothule ukubhala. Noma kunjalo, zikhona izinhlelo esinazo ukubhekana nalesi simo,” kusho uNkk Motshekga.
Uthe njengoba sekuqaliwe ukubhalwa kwezivivinyo zika-matric, amakhompyutha okugcina ulwazi ngamaphepha abhaliwe asehlolwe ngokwanele kwaqeqeshwa nabazobe beqoqa ulwazi.
Bangu-790 405 ezweni lonke abafundi baka-matric kuzwelonke okulindeleke ukuthi babhale izivivinyo zabo zokuphela konyaka ezikhungweni ezingu-7 416. Iphepha lokugcina libhalwa ngoNovemba 28.
UNkk Motshekga uthe bangu-212 abafundi ababhalisele ukuhlolwa abasezikhungweni zokuhlunyeleliswa kwezimilo.
Uthe zingu-15 izikole zabaphila nokungezwa ezibhalisele ukubhala ukuhlolwa kokuphela konyaka ku-matric ezweni lonke. Uthe izinsiza ezizolekelela abafundi sezikhona kuzona zonke izifundazwe.
“Ngasohlangothini lwethu sesikwenze konke okusemandleni ukulungiselela ukuthi abafundi babhale. Ingqalasizinda esinayo iseqophelweni lokunikeza umfundi ithuba lokuthi aphumelele ku-matric abhekane nezinye izinselelo ezingale kokuqeda u-matric,” kuchaza uNkk Motshekga.
Uthe eminyakeni emihlanu kube nesigameko esisodwa kuphela sokukopela wathi nalapho abamakayo ababamba lokho kukopela.
Uncome othisha ngomsebenzi omuhle abawenzayo nokuzikhandla kusukela umfundi eqala esikoleni kuze kube ka-Grade-12.
“Sifisela abafundi baka-matric ukubhala okuhle.”