Kwethulwe amathoyilethi aphephile ezikoleni
IZIKOLE ezine zaKwaZulu-Natal ebezinamathoyilethi ayingozi zakhelwe amathoyilethi amasha aphephile.
Amathoyilethi aphephile athulwe ngokusemthethweni kulezi zikole, okuyingxenye yokubambisana kukahulumeni nezinkampani ezizimele.
Inkampani yomshuwalene, i-Assupol, ngokubambisana noMnyango wezeMfundo eyiSisekelo, iNational Education Collaboration Trust, bakhele izikole eziyishumi amathoyilethi aphephile zasezifundazweni ezahlukene amathoyilethi aphephile, ezine zazo ngezaKwaZulu-Natal.
UNkk Bridget Mokwena-Halala, oyisikhulu esiphezulu kwa-Assupol, uthe bakholwa wukuthi wonke umuntu kuneqhaza okumele alibambe ekushintsheni izimo zempilo ezingezinhle emiphakathini. Sikholwa wukuthi uhlelo lokuphuculwa kwamathoyilethi ezikoleni kuwumbono omuhle. Yingakho inkampani yethu ifake isandla njengoba uMengameli wakuleli uMnuz Cyril Ramaphosa, ahlaba ikhwelo lokuthi izinkampani ezizimele kumele zibambe iqhaza kulolu hlelo,” kusho isikhulu.
Uhlelo lokuphucula amathoyilethi ezikoleni lwaziwa ngokuthi iSanitation Appropriate for Education (Safe).
UNkk Mokwena-Halala uthe izikole zaseKZN ezihlomule kulolu hlelo yiNgaqa Primary, iBhokoza Primary eziseSt Lucia, eMtubatuba, iHemu Hemu Primary eseMgungundlovu nePhecuka Primary eseVriyheid.
Uthe amathoyilethi akulezi zikole athulwe ngokusemthethweni kuleli sonto.
“Nyakenye sazibophezela ukuthi sizokwakha amathoyilethi angu100. Lawa mathoyilethi ayingxenye yaleso sibopho esazibophezela ngaso. Izifundazwe ezihlomulile yiLimpopo, i-Eastern Cape neKwaZulu-Natal,” kusho uNkk Mokwena-Halala.