Bahlukene phakathi exabana nenkosi
SIMANZONZO isimo phakathi kwenkosi ebambile yesizwe sakwaMpungose oLundi nosomabhizinisi wendawo, oyisola ngokuhlukumeza nokuyithumela ngezinduna ukuba zimshaye zimphuce nomhlaba wakhe.
Lesi simo kuthiwa sesidale ukuba umphakathi uhlukane phakathi endaweni njengoba kukhona abeseka inkosi uZini Mpungose nabahambisana noMnuz Sishwili Nkosi (58) ongusomabhizinisi odumile oLundi.
Ingxabano yabo isize yangenwa ngamaphoyisa ngoba uNkosi usekubeke kwacaca ukuthi akasophinde alubhade enkantolo yenkosi ngoba iyamhlukumeza, ibuye ilwe naye ngokuthi uma ebizwe enkantolo ufika egqoke izikhindi ezivamise ukufakwa ngabalimi, okukhalwa ngokuthi zehlisa isithunzi senkantolo yenkosi.
“Sengize ngayoyivulela icala inkosi uMpungose ngoba iyangihlukumeza futhi akumina ngedwa kodwa sibaningi lapha endaweni esithwele kanzima ngoba isikhokhisa nezimali zokuthutha isihlabathi esenza ngaso ibhizinisi. Iphinde ifune ukusiphuca umhlaba wethu ngenkani. Akusagcini lapho kodwa muva nje isisifuna izimali zokuba semhlabeni esiwusebenzisayo. Kodwa ayisasinikezi iziliphu ezigunyazwe wuMnyango wezokuBusa nokuBambisana neziNdaba zoMdabu. Mina kuthe ezinsukwini yangithumela ngezinduna zayo, zangishaya zaze zangilimaza ubuntu bami, ngacishe ngafa zingibuza ukuthi umhlaba enginamabhizinisi kuwo, okungowami, ngiwusebenzisa ngegunya likabani,” kusho uNkosi.
Uthe inkosi ibafuna nezimali zokuya phesheya. Kodwa ingabaniki incazelo ecacile ukuthi phesheya kuyokwenziwani, ngaphandle kokuthi ibatshela ukuthi kuyokhangiswa ngendlamu.
Izinduna zayo inkosi uMpungose namanye amalungu omphakathi angosomabhizinisi bavimbe Isolezwe liyobona inkosi, bethi bafuna ukucacisa ukuthi iyasukelwa ngoba ingumuntu wesifazane, ihlukunyezwa nguNkosi udla umhlaba wayo awudayise.
UMnuz Danger Mfusi oyinduna yenkosi, uthe kuyiphutha okushiwo nguNkosi ngoba usewuhluphile umphakathi edla izindawo zabantu.
“Lo muntu wadla ngisho ugandaganda womphakathi ngoba ethi wazilungisela. Hhayi-ke angisayiphathi eyomhlaba wenkosi. Usewuqedile ewudla abuye awudayise bese ethatha imali ayogembula ngayo eMpangeni ngoba ukukhonzile nokugembula. Sihlukumezekile ngaye. Inkosi uyayisukela kukho konke akushoyo ngoba nangesikhathi sifika kuye sasithunywe yiyo ukuba siyokhuluma naye ngokuziphatha kwakhe. Kodwa asizange simshaye. Njengoba singamakhehla amadala kangaka singamshaya kanjani loya muntu onezingalo ezingaka? Nasenkantolo akahloniphi, ufika egqoke izikhindi lezi zabalimi bamaBhunu, eziveza umuzi wendoda. Samtshela sathi akahlukane nalo mkhuba ngoba wukungahloniphi lokhu akwenzaya futhi uyazi ukuthi namantombazane agqebhezile ayaxoshwa enkantolo,” kusho uMfusi.
UNkosi uvumile ukuthi ugandaganda wawudla ngoba wazilungisela ngoR30 000 usufile. Kodwa uma esethi umphakathi awukhokhe wahluleka, wavele wazithathela wona. Uthe kuleya nkantolo uhlale ethukwa, esatshiswa yikho engasayi khona ngoba awukho nomthetho othi akangazigqoki izikhindi, kubhalwe ukuthi izibhamu azingeni.
Inkosi icele Isolezwe lifike kuyo eMkhazane oLundi. Kuthe uma lifika yangabe isalubamba ucingo yaze yathunyelwa umyalezo. Kube sekufona isihlobo sayo, sathi iphatheke kabi ngemibuzo ethunyelwe yona ngakho isiseThekwini futhi ayizukuphendula.
Okhulumela amaphoyisa, uLt Colonel Thulani Zwane, uthe kulesi sigameko kuboshwe owesilisa oneminyaka engu-56 waze wavela enkantolo kodwa kabanayo imininingwane yecala.