Ababoshwe abagwazisayo: ofundisa ukushayela
UMNIKAZI wezikole zokushayela, uMnuz Mzwandile MG Zondi, ugqugquzele uhulumeni ukuthi aqhubeke nokubopha abasebenzi bezikhungo zokushayela abagwazisayo.
UZondi weSiyajabula Driving School uthe kubajabulisile ukubona oKlebe bebopha abasebenzi abawu-20 bezikhungo okuvivinywa kuzo abashayeli ngoba kuhlale kuthiwa ngabanikazi bezikole zokushayela abagwazisayo.
“Siyajabula ukuthi oKlebe babophe abasebenzi abawu-20 bezikhungo okuvivinywa kuzo abashayeli ngoba kuhlale kuthiwa yithina esigwazisayo. Siyajabula nokuthi amacala abo ayashesha ngoba umabhalane wesikhungo esiseHowick ulivumile icala lakhe. Uzogwetshwa ngoMsombuluko ozayo. Omunye kulindeleke ukuthi icala lakhe lingene ngoFebhuwari.”
Uthe uma abantu bethenga amalayisensi kusho ukuthi abasayi ezikoleni zokushayela okungaholela ekuweni kwamabhizinisi aqashe inqwaba yabantu.
“Siyacela abantu uma bezofundela ukushayela babuze ukuthi izikole zisemthethweni yini ngoba sinazo izitifiketi esizinikwa wuMnyango wezokuThutha ezikhombisa ukuthi izikole zethu zisemthethweni. Ngisho abafundisa ukushayela bayaqeqeshwa ukuze benze okusemthethweni. Sithi uhulumeni makaqhubeke nokubopha abasebenzi abakhwabanisayo.”
Uthe basohlelweni lokuthi kutholakale izitikha ezizoqinisekisa ukuthi izimoto zezikole zokushayela ezisemthethweni zisheshe zibonakale.
Udonse ngendlebe abafundela ukushayela ukuthi bangavumi ukugwaza ngoba basuke befundiswe into ekhona ngakho abakwazi ukufeyila bebe benza into akade beyifunda esikoleni.
Uxwayise abanikazi bezikole zokushayela ukuthi bangagwazisi ngoba uma beke batholakala begwazisa zizovalwa izikole zabo.
UMnuz Simon Zwane, okhulumela iRoad Traffic Management Corporation (RTMC), uthe abasebenzi ababoshiwe bebesesikhungweni saseHowick futhi bakhiphe amalayisensi omkokotelo awu-544.
Kuthiwa lawa malayisensi akhishwa phakathi kukaFebhuwari noMashi wonyaka odlule ngaphandle kokuthi abanikazi bawo bavivinywe.
UZwane uthe bazoqhubeka nokulwa nenkohlakalo besebenzisana nezinhlaka zomthetho kuzo zonke izifundazwe.
UMnuz Kwanele Ncalane, okhulumela uMnyango wezokuThutha KwaZulu-Natal, uthe bagasela ezikhungweni ezikhipha amalayisensi ukuze balwe nenkohlakalo bahlenge nempilo yabantu emgwaqweni.
Uthe abantu abagwazayo bazoboshwa ngoba wonke umuntu ozoshayela kufanele abe nolwazi olufanele ukuze angadali izingozi.