Zimkhalele obebhalela abafuna ama-learner’s
KUBOSHWE owesilisa ngemuva kokutholakala ukuthi uhlomule ngoR87 500 ngokubhalela abantu abangu-25 izivivinyo zokuhlolelwa izincwadi zokushayela imoto.
Umsolwa oneminyaka engu39, uboshwe esikhungweni sokuhlolela ukushayela izimoto ePinetown ngoLwesithathu, wabekwa icala lokukhwabanisa.
Kusolwa ukuthi ubekhokhisa umuntu ngamunye uR3 500 ngokubhala isivivinyo.
UChief Inspector Lance Colborne, osebe ngumphenyi wamacala alolu hlobo iminyaka engaphezu kweshumi uthe bathole amaphepha angu-25 ezivivinyo abhalwe ngumsolwa, esebenzisa amagama ahlukene.
“Sibone umazisi oyibhuku eliluhlaza, obunesithombe esinanyathiselwe phezu kwesinye salo mazisi.
Besingaphezulu isithombe sikamsolwa, obekwenza kubukeke sengathi wumazisi wakhe. Kodwa bekwehluke igama inombolo kamazisi namagabelo. Sibe sesithola ukuthi kunamafayela angu25 anesithombe sikamsolwa esebenzisa amagama ahlukene.
“Ngikwazile ukusheshe ngibone umsolwa ngoba sengike ngambopha phambilini ngecala elifuze leli,” kusho uColborne.
Uthe kusolakala ukuthi umsolwa ubewaka abantu ezikhungweni ezehlukene KwaZulu-Natal.
Uqhube wathi kulindeleke ukuba kuboshwe abanye abantu ngalo mkhuba.
“Abasolwa bafika ezikhungweni zokuhlolela izincwadi zokushayela imoto, babhalele abantu.
Akupheli ngisho imizuzu emihlanu bebhala. Sizobathungatha ngenhloso yokubopha abantu abanika abasolwa omazisi babo, ukuba bababhalele,” kusho uColborne. Uthe ngeke baphumule bengakababophi ongqondongqondo balokhu kukhwabanisa. Okhulumela uMnyango wezokuThutha KwaZulu-Natal, uMnuz Kwanele Ncalane unxuse bonke abantu abahlomule ama-learner’s licence kulo mkhonyovu ukuba bazinikele bona emaphoyiseni.
“Kuseyisiqalo lesi, ithimba lethu leRoad Traffic Management Corporation (RTMC) noKlebe basebenza ngokuzikhandla ukuqeda lo mkhuba.
“Kuzokwenziwa isibonelo ngozobanjwa ewaka abantu ngale ndlela,” kusho uNcalane.
AbeRTMC bathe kuboshwe nabasebenzi babo abayisikhombisa eLimpopo.