Umnikelo wenhlangano yezenkolo ozoxazulula inkinga yamanzi ezikoleni
KUPHELILE ukuthutha izigubhu zamanzi ekhaya azilethe esikoleni uthishanhloko wesikole saseNanda, esikwezinikelelwe ngama-bore hole amanzi, izolo.
I-New River Combined isezikoleni ezintathu ezinikelelwe yinhlangano yenkolo i-Arya Sama of South Africa nenhlangano i-Ishwar & Laila Mangaroo Foundation Trust. Lezi zikole okubalwa iMandosi Combined neSuleman Patel Secondary, zisendaweni esemakhaya enenkinga yokushoda kwamanzi. Uthishanhloko waseNew River Combined, uMnuz Sandile Ncube, uthe bebethwele kanzima ngenxa yokushoda kwamanzi.
“Bekunzima ukusebenza esikoleni ngoba amanzi abengenele. Kunezikhathi lapho bekumele ngithuthe amanzi ekhaya ngezigubhu ngiwalethe esikoleni. Bekunzima nokupheka nokuhlanza amathoyilethi ngenxa yokushoda kwamanazi. Kuthe uma sesinethangi lamanzi sasizwa izimoto zikamasipala ebezisilethela,” kuchaza yena.
Uthe ngalo mnikelo sebezokwazi nokuba nensimu ngoba bekunzima ukutshala amanzi engekho. Uthembise ukuthi bazowulondoloza umnikelo futhi bayethemba ukuthi basazoyithola neminye iminikelo ngoba isikole sisilele emuva kakhulu ngengqalasizinda.
UMnuz Bongani Ndlovu, onguthishanhloko eSuleman Patel Secondary, uthe isikole sakhe sisemakhaya okwenza kube nzima nokufika kwezidingo. Uthe umphakathi unenkinga yokushoda kwamanzi okuthikameza nesikole.
UNdlovu uthe bekuthi uma kuphele amanzi bashayele ikhansela ucingo kuthunyelwe izimoto zikamasipala.
“Besihlupheka kakhulu ngoba amanzi emvula ebesiwafaka emathangini abengekho esimeni sokuphuzwa. Bekudingeka sisebenzise amakhemikhali ukuwahlanza,” kusho yena.
Oyikhansela ku-ward 3, uMnuz Mpilenhle Mkhize, uthe ukulethwa kwalo mnikelo wamanzi kuzokwehlisa umthwalo nakumasipala obekumele uthumele izimoto zamanzi. Uthe zonke izikole ezikwi-ward yakhe zinenkinga yamanzi ngoba zisemakhaya.
“Sicela ukuthi umphakathi ubambisane nezikole ulondoloze lo mnikelo. Kumanje sinenkinga yokuthi amathangi afakwe emiphakathini ayebiwa,” kusho uMkhize.
UMnuz Vidhor Mangaroo, oyisikhulu esiphezulu enkampanini yamabhasi iMetro Group eyilungu le-Ishwar & Laila Mngaroo Foundation Trust, uthe basiza izikole eziswele kakhulu. Uthe njengoba benamabhasi babheka izidingo zomphakathi abawuhambelayo bawusize. Uveze ukuthi bazwile ngezikhalo zalezi zikole bathinteka ngoba ayikho into engenziwa amanzi engekho.