Banenhlanhla abadlali bamanje ngezeluleko abazitholayo
GASE ngizibona ngiyisilomo ngasebenzisa i-cocaine. Uma nithanda ningabuza uDkt Irvin Khoza ukuthi bangicoshaphi ngesikhathi ngisayina kwi-Orlando Pirates.”
La mazwi uJabu “Pule” Mahlangu uwasho eluleka abadlali bebhola esithangamini esihlelwe ngabaphisi botshwala iDiageo.
Ukukhuluma kwakhe kanje ngamaphutha akhe kukhomba ukuthi unenhlanhla yize avumela utshwala ukuthi busiphuthisele ngekhono lakhe.
Kuyinto eyaziwayo ukuthi iKaizer Chiefs yageza izandla ngoMahlangu. Emva kweChiefs, wadlulela kwiSV Mattersburg yase-Austria eyamxoshela ukushayela ephuzile. Wabuyela ekhaya, wajoyina iSuperSport United. Nakhona waqhubeka nezinkamba. Waze wayiswa esikhungweni sokuhlumelelisa isimilo ngo-2005 kodwa kwanhlanga zimuka nomoya, wagcina ekhonjwe indlela. Yilapho-ke alandwa khona yiPirates.
Impilo kaMahlangu ithi kayifane nekaMbulelo “Old John” Mabizela owasuka kwiPirates wayogijima kwiTottenham Hotspur yaseEngland ngo-2003. Kwakufihlwa ukuhlupha kwakhe esekwiBhakabhaka. Umbuleke izinqe esekwiSpurs esebuye ahlulwe nawukuya ejimini ngenxa yobumnandi. Yize babejabule ngebhola lakhe kwiSpurs kodwa bahluleka wukubekezelela ukungalali kwakhe ejuxuza.
Baningi abadlali abasiphuthisele ngebhola elimnandi ngenxa yotshwala. Omunye wabo nguJeffrey Ntuka odabuka eKroonstad, eFree State. UNtuka ushone ngo-2012 engaselutho kade enekusasa eliqhakazile kodwa wavumela ukuthi limoshwe wutshwala. UNtuka wagwazwa wafa kade echithwe yiSuperSport seyikhathele ukuziphatha kwakhe. Wayedlala kuyo esuka kwiChiefs nayo ahamba kuyona isidelile wuye. IChiefs yayimnike inkontileka esuka kwiChelsea yase-England ayeyijoyine ngo-2003. Wayesedlale imidlalo ewu-93 kwiChelsea kwase kubhoka idimoni.
Okubuhlungu ngoMahlangu wukuthi kwaze kwashona unina kuthiwa ukhathazwa wukuziphatha kwakhe.
Sithi banenhlanhla abadlali besikhathi samanje ngoba bayaqwashiswa ngezikhisi abangase bakhalakathele kuzo bese ziqeda ngekusasa labo. Sithi ubumnandi abupheli, bazobufica noma sebeyeke ukudlala.