Kukhala esami isicathulo kwi-DA - Maimane
NGIYAVUMELANA nalona owathi kwipolitiki asikho isitha nomngani waphakade, umuntu othi ungumngani ujika ahlangane nezitha zakho bakujuqe ngomkhonto ungazelele. Ngubani ongathi wayazi ukuthi ngelinye ilanga kuyojika kube nokuxokozela okunje kwi-DA kuhlanganwe ngegama likaMmusi Maimane. Namuhla sekungathi yiphupho ukuthi nguMaimane lona obengaconsi phansi kumalungu eDA osephenduke iqaqa elibekwa amabala okuthi nguyena owehlise izibalo zokwesekwa kweqembu. OkaVolos uxoxa noMaimane efuna ukuthola uvo lwakhe ngesimo azithola ebhekene naso.
Volos: Mntaka Maimane iqiniso lisobala okwezinqa zesele, abelungu sebefuna ubabuyisele iqembu labo.
Maimane: I-DA akusiyona eyabelungu kodwa engayabantu bonke abakholelwa emigomeni yayo, uma kunabathile abathi ingeyabo basuke bezidlalela imizwa nje.
Volos: Kungabe iyiqiniso imibiko yokuthi sewuke wathunyelelwa ngezigijimi ezizokucela ukuthi wehle ekuholeni iqembu?
Maimane: Ngicela ukungayiphenduli indaba yezigijimi ezifika ngobusuku ngoba mina ngaqokwa yizithunywa zeqembu zathi angilihole. Labo abakhokhoba ebusuku bayokhokhoba baze bakhathale ngoba angiziqokanga kulesi sikhundla engikusona.
Volos: Ugcine nini ukuxoxa noTony Leon benoHelen Zille?
Maimane: Noma ngingasakhumbuli kahle kodwa kuyenzeka sixoxe uma sithuke sihlangana emihlanganweni yeqembu.
Volos: Kubantu abaningi sekukhona ukungabaza ukuthi usenguyena umholi weqembu, kunenkolelo yokuthi usuphenduke isichuse somholi oyisithusanyoni esilawulwa abathile.
Maimane: Emqondweni wami nasenhliziyweni yami anginakho nokuncane ukungabaza ukuthi kusakhala isicathulo sami kwi-DA.
Volos: Kunemibiko ethi uZille uthi nguyena owakha ikusasa lakho lezepolitiki, yingakho ekholelwa ekutheni angakwehlisa esikhundleni uma ethanda.
Maimane: Inkulumo enjalo ingaba iyiphutha ngoba mina ngaziqalela indlela yami yezepolitiki, uma ipolitiki yangihlanganisa naye lokhu akusho ukuthi ngabunjwa nguyena.
Volos: Umbuzo obuzwa abantu uthi uZille usafunani ngoba wayihola iDA ngesikhathi sakhe, kuthini ukuphawula kwakho kulokho?
Maimane: Ngicabanga ukuthi uZille nguyena ongakwazi ukuwuphendula kangcono lowo mbuzo.
Volos: Osibhincamakhasane bathi okuyikhona okwenze wangathandeka kumalungu aphezulu eDA wukuthi uphenya izinqa zabatshalizimali abahambisana nomkhankaso weCR17.
Maimane: Umbuzo okufanele sizibuze wona othi kwenzeka kanjani ukuthi ngithi ngihlasela uRamaphosa oyimbangi yethu siyiDA kodwa kujike kube nabanye bethu abacasulwa yilokho?
Volos: Kungabe le nxushunxushu seyisho khona ukuthi neDA izoqembukelana phakathi kube khona neNew Democratic Alliance (NDA)?
Maimane: Ngokwami angiboni kuze kufinyelela lapho kodwa kufanele sakhe isu lokuhlanganisa ontamolukhuni nontamothambile babe nombono owodwa.
Volos: Kunokudideka okukhulu kokuthi kwenzeka kanjani ukuthi kube ngabebala elimhlophe bodwa abagaqele isikhundla sikasihlalo weqembu, ungaphawula uthini ngokungabikho bikho kwabampisholo abangenele umbango?
Maimane: Mina ngibona kuziqondanele nje ukuthi kube abebala elimhlophe bodwa abancintisanayo, awukho umyalelo othi abamnyama asibafanele isikhundla.
Volos: Uma ucabanga uZuma waphatheka kanjani uma ezwa izindaba zokuthi nawe usolwa ngenkohlakalo yokutetemuka ngemoto eyanikelwa ngabathinteka enkohlakalweni?
Maimane: Ngiyakholwa ukuthi wahleka waze waqethuka ekholwa wukuthi nami sengitholakele enkohlakalweni engangihlezi ngimsola ngayo.