Kulahlisa ithemba okwezwe lethu
MHLELI: Ngibonge ukucosha leli thuba lokuphefumula ngosiba kule ngosi. Ngibheka okumbalwa kokuningi njengoba siphila esikhathini sentando yabantu. Yebo sikubiza kanjalo kodwa mina angikayiboni. Engikubonayo yintando yabaphathi boMbuso. Benza izinto ezivuna bona.
Uhulumeni uyasibhuqa bese ethi uyasisiza. Ufike nezikole okungakhokhwa mali kuzo okuyinto enhle uma uyizwa kepha eyingozi ezinganeni zethu ngoba nolwazi ezilucosha kulezo zikole lufishane nothisha abafundisa lapho abaningi babo abanalo ugqozi nentshisekelo. Phela sekufundelwa ukuhola, alusekho ubizo ngomsebenzi. Inkingake engiyibonayo yile, izingane zongqongqoshe azitholakali kulezi zikole esifuhlelwe ngazo thina kobantu.
Umbuzo uthi akusilimazi yini thina bale mfundo uma sekumele zithole umsebenzi lezi zingane? Yini le mfundo ingalinganiswa? Thina njalo uma sifuna okungcono sihamba sibheka izikhala ezikoleni zomntakabani, bona abezi kwezethu ngoba bazi kahle ukuthi imfundo yethu ayikho ezingeni.
Lokho kuyakucacisa ukuthi ababusi boMbuso yindlela abalungiselela ngayo izingane zabo isizwe sezimpumputhe esizoholwa yizingane zabo ngemfundo ezinikwe yona. Kwezethu kuyohlale kuthiwa: “Nxese ubobuye uzame.”
Mumva nje kunendaba ekhulunywayo yokukhishwa kwezitifiketi umfundi engafikile ku-matric nazo njalo zenzelwe indlu emnyama ngeke uzibone ezabo zithola lolo daka lwephepha.
Yebo umbeki wenkosi akabusi nayo kodwa kuyosiza ukumphatha kahle ukuze akusize nangomuso. Akuniki themba okwale lizwe lethu. Kubukeka sengathi ohluphekayo usazohlupheka kakhulu obusayo abuse kakhulu.