‘Kwangisiza kakhulu ukushadelwa’
UMA ungena kuGoogle ubheka abaculi bowokholo abadala kuleli kuvela neqembu laseThekwini i-Avante.
Leli qembu selineminyaka engu27 liyibambile emculweni.
Lasungulwa nguLucky Cele, Linda Gcwensa, bese kuba uBongani Ngcobo noSiphiwe Khanyile abangasekho. Njengamanje linamalungu amasha okunguSizwe Mtambo noSibonelo Dlamini.
“Akulona iqembu kuphela elidala kodwa nakithina sekukhulakhulekile,” kusho uLucky.
“Ngineminyaka engu-45 manje futhi ngiyafisa uThixo angigcine ngoba izingane zami ziyangidinga.”
Lo mculi unezingane eziyisishiyagalombili kanti ezimbili wabusiswa ngazo emshadweni. Uthunjana unonyaka. “Ngineminyaka eyisikhombisa manje ngishadelwe. Kwangisiza kakhulu ukushadelwa ngoba izinto engangizenza angibange ngisaqhubeka nazo. Njengamajita sasiba wuvanzi sihamba singabikile. Sasishela kanti manje awukwazi ukwenza lokho ngoba unkosikazi ubuye aphendule iselula yami kodwa futhi ngizihlonipha mina naye.”
Uthe manje impilo yakhe ishintshile ngoba ukhonze ukuhlala endlini, ayihlanze aphinde apheke uma umkakhe esemsebenzini. Kungenjalo uhlala nabangani bakhe okubalwa umculi wekwaito uProfessor nomlingisi ophinde abe ngusomahlaya uPastor Mjosty.
ULucky uthe baqala umculo besafunda KwaMashu lapho bakhulela khona.
“Emabangeni aphansi ngangifunda eKhethamahle Primary ngabe sengidlulela eKwesethu High. Yilapho okwaqala khona i-Avante noLinda, James noBongani. USphiwe wayefunda eNhlonipho,” kusho uLucky.
Uthe njengabafana abaningi, bakhula bedlala ibhola kodwa umculo yiwona owachuma. Umculo wokholo bawukhetha ngoba bekhulele esontweni futhi uyise wayengumbhishobhi.
“Sasifuna nokwenza umehluko elokishini ngoba kwakwande le nto yodlame. Ngisho nabangani bethu babephatha izibhamu.”
Uthando lomculo lwenza kwaba nzima ukuqhubeka nemfundo ngoba yena nozakwabo bavele bagxila kuwo.
“Sangenela umncintiswano iShell Road to Fame saze saya naseSun City simele isifundazwe. Kwakuyoba ukumosha imali yabazali uma sasingathi kukhona okunye esingakufunda.”
ULucky uqhube wathi kuningi osekushintshile emculweni uma eqhathanisa nesikhathi abaqala ngaso. Emuva kokusebenza kwiLion King benza umculo, bakhipha i-albhamu yabo yokuqala ngo-1997 eyayithi Sinethemba.
“Ngaphandle nje kokuthi umculo awusadayisi njengakuqala kodwa abaculi sebesebenza ngabodwana kakhulu. Umculo kumele sabelane ngawo sisebenzisane. Kunamaqembuqembu manje angiphathi khona kulo mkhakha wethu wokholo. Ngike ngibone emicimbini enjengoVukile Gospel Festival abantu bavele bazihlalele emakhoneni kube sengathi uyamhlukumeza uma umbingelela.”
Njenge-Avante basebenze nabaculi abaningi okubalwa kubo uRebecca, Vuyo Mokoena, Mandoza, Ringo nomculi wekwaito uProfessor. UProfessor basasebenza naye njengoba besenkampanini yakhe iProper Files.
Balungiselela ukukhipha i-albhamu yabo ka-16 kule nyanga.
“Sibophele kakhulu kuyo ngoba kukhona uMbuso Khoza, Donell Jones wase-US, Skhulu Miya, Sipho Mbhele noBabo Ngcobo. UDonell senze naye ingoma ekhuluma ngokuhlukunyezwa kwabesifazane. Basazama ukumletha ngapha ukuze sizokwenza i-video.”