I-Holy Life Family izimisele ukushintsha umculo wokholo
IQEMBU lomculo wokholo, iHoly Life Family, eseliwuzungezile umhlaba lizimisele ukuguqula lo mculo.
IHoly Life Family isanda kukhipha iDouble CD esihloko sithi The Power And His Glory, eqoshwe bukhoma eCity Life Church, eSandton.
Umholi weqembu, uSerame Buang, uthe iHoly Life Family yasungulwa emuva kombono owafikela uMfu Abia Mophethe eminyakeni ewu-19.
“Wafikelwa wumbono wokwethula iqembu emphakathini ukuze libe wumlomo kaKhrestu. Siphila ezikhathini lapho isonto seliphenduke inkundla yokufeza ezinye izinhloso. Inhlosongqangi ngeqembu ukusabalalisa ivangeli nokubuyisa ukuthi kuchaza ukuthini ukuba kuKhrestu.”
Kwi-albhamu yalo kuboshelwe izingoma ezithi Inxaniwe, Great Is Thy Faithfulness, Yek’Umusa, Inyanga Enkulu nethi Siphakamisa Izandla.
Umculo weqembu uhlanganise isigqi samanje nesakudala okukhona kuso nezingoma abaziqambele zona nabazithekele ecilongweni.
“Amaculo ethu ayame kakhulu evesini eliku-1 Peter 1:16 elithi ‘Ukubuyisela udumo lukaNkulunkulu ebandleni likaKhrestu,” kuphetha uBuang.
IHoly Life Family yakhiwe yizintokazi eziwu-5 nezinsizwa ezimbili okunguD Mophethe, Pastor Isaac Pule, Paballo Sebetoane, Lerato Mphaka, Meisie Mofokeng noPoppe Lencoe nomholi weqembu uSerame Buang.
Seyiqophe ama-albhamu ayisikhombisa okukhona kuwo ethi Lebitso la Jesu, Jesu ke Morena, Makhofola, Live in Worship, Khanya ea Molimo, Worship Yawheh with Us, Welcome King of Glory & The Power and His Glory.
Umucu wayo esanda kuyikhipha esihloko sithi Uhambe Nami usuqalile ukudlalwa kakhulu emisakazweni.
Yize iqembu lizinze eDawn Park, eGoli, kodwa selibuya emazweni amaningi okubalwa kuwo ka-Israel naseMozambique, lapho eselike lanikela khona.