UBusiswa ululeka abaculi ngokuzimela
UBUSISWA uthi uma ungumculi wesifazane asikho isidingo sokuthi kube khona olala naye ukuze uqhakaze emculweni.
Lo mculi ukusho lokhu eluleka abaculi ababukela kuye njengoba esevule inkampani yakhe yokuqopha iMajesty Music.
“Ithalente lakho yilo elizokubeka lapho okumele ube khona. Yilo futhi elizokufaka endimeni liphinde likugcine usesicongweni. Kumele usebenze ngokuzikhandla, ungalali kodwa usebenze kakhulu,” kusho uBusiswa.
Uthe njengoba esenenkampani yakhe nje, wukuthi inkontileka yakhe neKalawa yaphela ngonyaka odlule.
“Ngisebenze ngedwa unyaka wonke futhi manje ngivula inkampani yami ukuze ngizokwenza ibhizinisi ngendlela, ngihlele izinto ukuze ngizosebenza nabanye abaculi,” kusho uBusiswa.
Uthe isinqumo sokuzimela usithathe emuva kokubona ukuthi usebe ngaphansi kwenkampani iminyaka eyisithupha.
“Ngibone ukuthi ngifunde okuningi ngokwanele, sekuyisikhathi sokuzimela. Sengibe ngedwa isikhathi esiwunyaka. Lokhu kungenze ngabona ukuthi ngenza kahle futhi sengikulungele ukuthatha elinye igxathu okuwukuqala inkampani yami. Nginethemba lokufaka izindlovukazi ezincane nabanye besifazane emculweni sishintshe izinto.”
Uqhube wathi okwamanje inkampani usafuna ukuyikhulisa ngokwanele ngaphambi kokulanda abanye.
Lo mculi usanda kukhipha ingoma entsha ethi Drinks on Me ayenze noPex Africah bapika u-Oskido noXelimpilo.
Uthe unenqwaba yomculo omusha ozayo futhi ngoNovemba uzokhipha i-albhamu iSummer Deluxe.
“Ngikulungele ukuba nehlobo elihle futhi ngihlale nginomculo omusha ozayo. Ngiyasebenza, ngeke ngiyeke ukusebenza ngoba umculo yiyona nto ephambili nesemqoka.”