‘Akulutho ukuthanda Amakhosi’
UMDLALI osanda kufika kwiCape Town City, uMark Mayambela, uzoke akubeke eceleni ukuba wumlandeli weKaizer Chiefs uma sebebhekene nayo kodwa alwele ukufaka ezakhe emzuliswaneni olandelayo weTelkom Knockout.
ICity izokwamukela iChiefs emdlalweni weLast 16 eCape Town Stadium ngoMgqibelo ngo-3 ntambama.
Ngesikhathi uMayambela ekhuluma nabezindaba kuleli sonto ukuvezile ukuthi ukhule ezifela ngaMakhosi. Nokho uthe konke lokho uyakukhohlwa uma sekumele abhekane nawo kangangoba ulinyusa ngenye indlela izinga lokudlala.
“Kusukela ngimncane benguwumlandeli wayo (iChiefs). Mhlawumbe yingakho njalo uma ngidlala nabo ngigqugquzeleka ngenye indlela ngenxa yaleyo ndawana yokuyithanda enginayo,” kusho uMayambela.
Uma uMayambela esithola isikimu kuzobe kuwumdlalo wakhe wesibili kwiCity. Uyijoyine ekuqaleni kwenyanga emuva kokuhlala engenankontileka selokhu ahlukana neChippa United ekupheleni kwesizini edlule. Emdlalweni wakhe wokuqala ushaye igoli yize iqembu ligcine lihlulwe AmaZulu FC ngo 2-1 emdlalweni we-Absa Premiership.
“Uma uwumdlali uhlezi uyibheke ngabomvu imidlalo efuze lena. Ukudlala neChiefs kuyinto enkulu futhi-ke isefomini enhle. Ngithemba ukuthi ngizokwazi ukusiza iqembu lami lidlule esigabeni seLast 16,” kusho uMayambela.
Leli nxele liqale ukugqama ebholeni lisadlalela iBloemfontein Celtic lapho ligcine liteketiswa ngo“Professor” ngenxa yendlela ebelilikhulumisa ngayo ibhola enkundleni.
Like lasayina kwi-Orlando Pirates kodwa langalithola ijezi kodwa isikhathi esiningi sayibuka nezihlelwe imidlalo ngesikhathi eZimnyama zinqoba izindebe zilandelana phakathi kuka-2010 kuya ku-2013.
UMayambela ubona iCity njengeqembu elikhulu futhi elifanelwe wukunqoba izindebe.
“Ngokwami iCape Town City nayo iyiqembu elikhulu. Kumele siyiwine indebe. Asidingi kube womunye umuntu ositshela lokho. Sinabo abadlali abanamava okunqoba izicoco njengoMpho Makola noKermit Erasmus. Nami ngokwami ngiyafuna ukunqoba indebe,” kusho uMayambela ongowokuzalwa eKapa lapho esebuyele khona.
Uthe nokuba nomqeqeshi ongumnqobi njengoBenni McCarthy kuyabagqugquzela.
“UBenni ungumnqobi. Wayekukhombisa lokho ngisho sisadlala naye kwiPirates. Nguyena obesihola esikhuthaza ukuthi silwele ukuwina ngaso sonke isikhathi. Kusenjalo namanje. Yingakho ngikholwa wukuthi uzokhula kwezokuqeqesha akwazi nokumelana nezinye izimo ngendlela ehlukile, aphinde aphumelele,” kusho uMayambela.