UMosimane unethemba ngo-Oupa
UMQEQESHI weMamelodi Sundowns, uPitso Mosimane, akaboni sekuphelile ngoOupa Manyisa phezu kokuba iningi likholwa wukuthi ukulimala kwakhe kungamphoqa ukuthi awaphanyeke emgibeni amakhokho ngenxa yokuhamba kweminyaka.
UManyisa ulimale ngesikhathi iSundowns ibhekene neKaizer Chiefs emdlalweni we-Shell Helix Ultra Cup. Udonseke umsipha ohlanganisa izithende nesihluzi.
UManyisa ulimale ekade esizwa ngendaba isikimu kwiSundowns kusukela kuqale isizini ka-2019/2020. Ugcine ukunikwa ithuba emdlalweni weCAF Champions League emasontweni edlule ngaphambi kokudlala koweShell.
UMosimane uthe uManyisa kufanele afunde kokwenzeke kuSibusiso Vilakazi obuya ekulimaleni okufanayo kodwa walulama kusasele amasonto amane esikhathini ebesibekwe ngodokotela. UVilakazi ulimale ngo-Okthoba nyakenye kodwa wabuya wathola indawo esikwatini seBafana Bafana esidlale kwiAfrica Cup of Nations ngoJuni.
“Lokhu kulimala kokudonseka komsipha kwenzeka kuMorgan Gould kodwa namanje usadlala. Kwenzekile kuSbuda Vilakazi ekwiBafana. U-Oupa kufanele abuke uVilakazi obuye kusasele amasonto amane ngokohlelo abebekwele lona nesikhathi esibekelwe umsipha wesithende. Kwasimangaza lokho kodwa siyazi ukuthi kungani. Yingoba zonke izinsuku ezinyangeni eziyisikhombisa azihlalile ubekade esejimini, ezinakelela engakhuluphali, edla kahle. Ithimba lodokotela kufanele likubheke lokho ukuze nabanye abadlali babone ukuthi wenze kanjani ukusheshe alulame. U-Oupa kufanele axhumane noVilakazi ambuze ukuthi wenzeni, wenzebkajani, ahlale nodokotela. Sinodokotela ababili abazosebenza naye.”
Inkontileka kaManyisa neSundowns iyaphela ekupheleni kwesizini. Ufike eChloorkop ngo2017 esuka kwi-Orlando Pirates abekade esehlale kuyo iminyaka.
“Uzobuya. Sizomeseka njengoba kade seseka wonke umuntu. Angicabangi ukuthi sekuphelile ngaye. U-Oupa unejubane emilenzeni yakhe. Uyabona uma edlala ukuthi usenalo ijubane. Uma umdlali engasenalo ijubane, ngoba ngikubonile lokho ngami, uma kuphela ijubane ngenxa yeminyaka kufanele uliyeke ibhola. Yena usenalo. Kufanele abheke uKekana (Hlompho) kule minyaka usenalo ijubane. Ngimthathile siyodlala ne-Al Ahly wadlala unombolo 10, wasinika esikufunayo. Usengumdlali omuhle. Sizomeseka, ubalulekile kithina. Asibalaxazi abadlali,” kusho uMosimane.
ISundowns izobhekana naMaZulu emdlalweni we-Last 16 yeTelkom Knockout eLucas Moripe Stadium,e-Atteridgeville, ngeSonto ngo-3 ntambama. AmaBrazilians agcina ukuwina indebe yasekhaya, ngaphandle kweligi, ngayo iTelkom ngo-2016 ngesikhathi ewina neChampions League neSuper Cup.Kuzoba wumdlalo wokuqala wendebe kumqeqeshi omusha woSuthu uJosef Vukusic.
“Kuzoba wumdlalo onzima okubhekwe ukuthi siwuwine. UVukusic ungumqeqeshi omuhle oshintshe izinto kwiPolokwane City lapho abekade ekhona. Ungumqeqeshi osebenza kanzima futhi unesikwati esiphumule esidlala ngoMgqibelo size siyodlala ngomunye.Unozinti wabo wenza kahle kakhulu.UBongi (Ntuli) uhlala eyinkinga kithina futhi uhamba phambili ngamagoli. Kodwa imidlalo yomkhumulajezi inokwayo. Nyakenye sikhishwe yiBaroka.Nakuba umbandela kwiSundowns kuwukuwina ilgi neChampions League kodwa kufanele siwine noma eyodwa indebe ukuze sijabulise abalandeli. Sigcina ukuwina iTelkom sayisheba neligi,Champions League neSuper Cup.”