UMiddendorp nengcindezi yeCity koweTKO
UMQEQESHI weKaizer Chiefs, u-Ernst Middendorp, uyazi ukuthi kufanele bajuluke ukuze bagudluze iCape Town City abazobhekana nayo emdlalweni we-Last 16 yeTelkom Knockout eCape Town Stadium, kusasa ngo-3 ntambama.
IChiefs, ngelinye lamaqembu azoqala lo mqhudelwano eyizimfivilithi ngenxa yefomu ekuyona kwi-Absa Premiership. Amakhosi asesicongweni se-log okuyinto ekade yagcina ukubonakala eNaturena.
Kodwa iyazi ukuthi injabulo yabalandeli incike ezindebeni ezozidlalela. IChiefs iyaqala ukudlalela indebe kusukela kuqale isizini ka-2019/2020 kwazise kade ingekho kwiMTN 8.
UMiddendorp uthe kufanele balwe ngokuphindiwe kunangesikhathi bebhekene ne-The Citizens koweligi abawuwine ngo 2-1 emasontweni adlule.
“I-Cape Town City inesikwati esihle kakhulu, angingabazi ukuthi sizoyibeka ekubeni elinye lamaqembu amabili noma amathathu aphezulu ekupheleni kwesizini. Yilokho esikubhekayo. Ukuthi okwamanje imaphakathi ne-log akusho lutho.
“Inabadlali abasezingeni eliphezulu, kusukela kunozinti kuya kwaba sebhentshini. Siqala lapho ukubheka. Sidlale kahle ngeledlule kowePSL eNewslands Stadium, ikakhulukazi esiwombeni sesibili. Akukho ukungabaza ukuthi kufanele sishaye into ecokeme osukwini ukuze siphumelele,” kusho uMiddendorp.
IChiefs izodlala neCity sekubuye izethenjwa ebezikade zilimele uSamir Nurkovic, Siphosakhe Ntiya-Ntiya, Reeve Frosler noGeorge Maluleke.
NgoMgqibelo odlule iChiefs ihlule iMamelodi Sundowns koweShell Helix Ultra Cup kodwa yakhala ngaphansi kwiBloemfontein Celtic kwiMacufe Cup ngeSonto.
UMiddendorp uthe nakuba iqembu lakhe likhombisa ukuhlangana kodwa zisekhona izindawo okufanele zilungiswe.
“Awuzange ungibone ngigijima nendebe ngoMgqibelo ngibhiyoza. Awuzange ungibone ngiphoxekile ngimemeza (ngeSonto) ngesikhathi singawutholi umphumela esiwufunayo.
“Ngikuthatha kahle konke. Sinezikhathi emdlalweni okufanele senze kangcono kuze kufike lapho siwuphatha khona wonke umdlalo. Akukhathaleki ukuthi udlala iMacufe, Shell Helix noma ungcweka neMoroka Swallows kufanele siwine.Sizama ukufaka lowo mqondo kusukela siqale amalungiselelo esizini,” kusho uMiddendorp.