Siyilungele futhi siyilindile iJapan: Erasmus
AKAZIMISELE ngokuvulela iJapan ngisho intuba encane umqeqeshi wamaBhokobhoko, uRassie Erusmus, obuyele kukhonkolo wezithenjwa zakhe ememezela isikimu azobhekana ngaso nosokhaya beNdebe yoMhlaba, iJapan, ngeSonto ngo-12.15 emini, eTokyo Stadium.
Kwabaningi lo mdlalo uzoba lula kumaBhokobhoko ngenxa yomphumela oncomekayo awuthole ebhekene naleli qembu lesizwe, elaziwa ngeCherry Blossoms, ngaphambi kokuqala kweNdebe yoMhlaba. Kusukela betholane kowobungani (ezikaErasmus eziwunqobe kalula ngembudlu yamaphuzu), iJapan imangaze abaningi idla iqoqo ebelibophele i-Ireland ebalwa phambili emhlabeni neScotland, bobabili abasatshwayo kwiSix Nations.
Indlela edlala ngayo iJapan iphoqe u-Erasmus ukuba angalokothi acabange ukuzama izinto angazijwayele ngalo mdlalo, wabuyisela zonke izinkunzi zakhe ebezingekho eqenjini lesizwe linenebula iCanada kowokusonga iqoqo.
Yindaba endala ukuthi amaBhokobhoko axebula iCanada ngo 66-7. Nomphumela waseEngland ngo-2015, usekhona emqondweni ka-Erasmus yingakho kungazange kwethuse ukumbona elanda iqembu eselaziwa njengelikhulu.
Kubuye uSiya Kolisi noDamien de Allande. UBongi Mbonambi noTendai Mutawarira nabo babuyisiwe esikimini okuyisona esidlale owe-Italy (abayinenebule ngo-49-3), obuthathwa njengomqoka kakhulu emuva kokukhala ngaphansi kwiNew Zealand kowokuvula umqhudelwano.
Ukubuya kukaWille le Roux yikhona kuphela okuthusile.
“Indlela lesi sikimu esidlale ngayo kwi-Italy akubanga nzima ukusibuyisa. Sizokwakhela phezu kwaso kuze kube sekugcineni.
“Siyakhula siyiqembu. Nakulokhu sibheke okunye futhi okusha esikufundile esizoqhubeka nakho njengoba besenza masonto wonke. IJapan iqeqeshwe ngendlela efanele, yingakho kungangithusi ukukhula kwayo ngalesi sivinini. Kuzoba wumdlalo onzima kodwa siwulungele futhi siwulindele,” kusho u-Erasmus.
Sesisonke isikimu sakhe azoqala ngaso umdlalo ngeSonto simi kanje:
Willie le Roux, Cheslin Kolbe, Lukhanyo Am, Damian de Allende, Makazole Mapimpi, Handré Pollard, Faf de Klerk, Duane Vermeulen, Pieter-Steph du Toit, Siya Kolisi (ukaputeni), Lood de Jager, Eben Etzebeth, Frans Malherbe, Bongi Mbonambi noTendai Mtawarira.
Ibhentshi: Malcolm Marx, Steven Kitshoff, Vincent Koch, RG Snyman, Franco Mostert, Francois Louw, Herschel Jantjies noFrans Steyn.