Uzifuna zinqobile ezakhe uJozef Vukusic
UMQEQESHI waMaZulu FC, uJozef Vukusic, ufuna ezakhe zinqobe noma yingayiphi indlela uma sezibhekene neMamelodi Sundowns emdlalweni weLast 16 kwiTelkom Knockout (TKO), eLucas Moripe Stadium, ngeSonto ngo-3 ntambama.
Ngokusho kwalo mqeqeshi odabuka eSlovakia, nokudlala ngokulingana kulo mdlalo kungabasiza ukuthi badlulele phambili.
Lo mqeqeshi uthe bahlome ngayo yonke, kangangoba noma kungaqhamuka amaphenathi bayokwazi ukumangaza amaBrazilians bawashaye.
“Uma ufuna ukushaya iSundowns akufanele udlale ngendlela edlala ngayo, kodwa kufanele ubheke izinto wena obukhali kuzona bese uzisebenzisa. Mhlawumbe sidinga ukuthi sidlale ngokulingana esikhathini esejwayelekile, bese simincela amaphenathi ukuze sinqobe. Okubalulekile ukuthi lona ngumdlalo womkhumulajezi, ngakho noma yikanjani ukhona ozoliwasha,” kuchaza uVukusic.
Kule sizini Abafana Ba Style abakashawa kwi-Absa Premiership, umdlalo abasehlulwe kuwona ngoweSuperSport United ebashaye ngo 2-0 emlenzeni wesibili kwiMTN 8.
“Sithole isitha esihle, ngesikhathi esisidingayo kwiSundowns. Kuleli lizwe yibona abayiqembu elidlala into ecokeme. Ngilindele ukuthi basithwalise kanzima, ngoba banabadlali abasezingeni eliphezulu. Nokho nathi sizilungiselele kahle ngoba sinemidlalo emibili yesihle, ngakho ngilindele ukuthi sidlale ngokuhleleka manje ikakhulukazi uma ubhekene neqembu elisezingeni elifana neSundowns,” kusho uVukusic.
Akucaci nokho noma uzobe yingxenye yini yalo mdlalo uTalent Chawapiwa ogijima ophikweni Osuthwini njengoba ephume kungasekuhle ngesikhathi iqembu liziqeqesha ngoLwesithathu.
Ngeledlule Abafana Ba Style bashaywe yizimbangi zabo ezinkulu iKaizer Chiefs ngo 4-2 kwiShell Helix Ultra Cup.
Nakuba kade kuwumdlalo wesihle, uPitso Mosimane opheka iSundowns ubengeneme ngendlela abashaywe ngayo. UVukusic uthe ukushaywa kwezikaPitso akusho lutho ngoba bazoza kubona bethelwe ngezimbonkolo.
“Angiboni ukuthi umdlalo weChiefs ububalulekile kwiSundowns. Uzokhumbula ukuthi sibhekene nabantu abanesikwati esikhulu, futhi bakujwayele ukudlala imidlalo eminingi emiqhudelwaneni eyahlukene,” kubeka uVukusic.
Kungenzeka kulo mdlalo abalandeli boSuthu babone uMario “Mnyango Wase-Mall” Booysen edlala umdlalo wakhe wokuqala woSuthu njengoba kulindeleke ukuthi asayine noma yinini naleli .