Ubuhle beCLA
BAKHIPHE unyawo ngeMercedes-Benz CLA ngenxa yobuhle bayo nobuchwepheshe.
Lokhu kufakazelwe wukuthi ngesikhathi ngiqeda ukuyipaka e-Oyster Box eMhlanga ngizithole sengizungezwe yizaguga zabelungu ebezibukeka zithathekile iyona.
Imibuzo ebezingiphosa yona ethi ikhishwe nini ngoba aziyazi futhi ibukeka ibiza. Ubungathi kukhona nokungakholwa ukuthi le moto ingashayelwa wumuntu osemncane njengami ngendlela ebukeka ihlonipheke ngayo.
Kuhlule ngisho sengichaza ukuthi ngiyintatheli yezezimoto kodwa bezilokhu zingihalalisela zithi ngibusisiwe ngokuhamba ngalolu nyanyavu lwemoto.
AbakwaMercedez abanakho nokuncane ukungabaza nokuzisola ngokukhipha le moto njengoba besho kugcwale umlomo ukuthi inobuhlakani obuyinqaba.
Abengezile ubuchwepheshe kuphela kuyona kodwa nendlela ebukeka ngayo iyaheha. Emgwaqweni ithule uma uyishayela futhi kuyezwakala ukuthi imoto enamandla. Indlela ebambelela ngayo emgwaqweni yenza ungezwa noma usugijima.
Uma unganakile ungazithola usuziqoqela amathikithi ushaywa amakhamera. Inamasensa umzimba wonke. Uma uyidumisa upakile phakathi kwezimoto ikuvezela yonke into eseduze kwayo ukuze ungashayisi.
Uma ususondele kakhulu emotweni oyilandelayo iyakutshela nokuthi bamba amabhreki ngoba usuzoshayisa. Isikhulu esiphezulu kwaMercedes-Benz South Africa, uJohannes Fritz sithe yize le moto iseyintsha kodwa abantu bayithandile njengoba sebedayise ezingu-750 000 emhlabeni wonke.
Uveze ukuthi amakhasimende ayakwazi ukwandisa ubuchwepheshe bayo ngokuthi acele ukwakhelwa eyi-Edition 1. Ine-MBUX. Inamathoshi ayi-LED.
Enjinini kukhona eyi-CLA 200 ne-CLA 220d. I-CLA 200 ingu-1.3 litre enamandla angu120kW netorque engu-250 Nm. Isebenzisa i-7G-DCT dual-clutch transmission. Kwi-220d kukhona injini engu-2.0 litre kadizili enamandla angu-140kW netorque engu-400 Nm. Ugearbox uyi-8GDCT dual-clutch transmission. Inani CLA 200 CLA 220d R570 500 R612 800