Qaphela izinto ezingadalelwe ukuba semotweni
LWASHO lwatshikiza lolo hlanga olusukuma kanye ngesonto, lwavusa amadlingozi kwaqubuka uhlevane kwaluma yonke indawo ngazithola sengimpongoloza ushuni wama hazard. Lokho kusho khona ukuthi yisikhathi sokuthi ngigxavule ipeni ngigiye kule nkundla yama hazard. Sesifikile isikhathi kwazise ipeni lama hazard yisona sikhali esiklwebha ngaso maqede kudede ubumnyama kwelakho lodumo eliwela umfula ugola izintethe.
Masethembe ukuthi nawe usumi endaweni ephephile njengami ukuze singaphazamisi abanye abasayobamba elabo eliwela umfula ugcwele.
Ufuqane lwami luchukuluzwa wukubona abantu bevunule ngezimbadada ezakhiwe ngamasondo ezimoto. Uma ngihamba emakhaya, ikakhulukazi, ngijwayele ukubona amasondo ezimoto ethiwe chwa phezu kwezindlu kanti esilungwini kuyenzeka uwafice esenziwe imijikelo yezingane.
Ngibe sengizibuza ukuthi konje ikhona yini into engakhelwanga noma engadalelwanga ukusebenza emotweni kodwa abanikazi bezimoto abagcina beyisebenzisela ukuthi ibambele okuthize okuyisidingo emotweni.
IZAMBANE: Abashayeli abaningi bazokutshela ukuthi uma kwenzeka ufelwa amawayipha emoto yakho, thola izambane inkosi yokudla ulisike uligcobe ewindini imvula izozigingqikela. Iqiniso ukuthi izambane alisizi kangako ngaphandle kokuthi liqeda ukwakhela kwamanzi aba samazolo ewindini bese edala ukuthi ungaboni kahle. Nalo nje liyisithipha. Empeleni ukhona umuthi wakhona ongcono obizwa nge C-thru osizayo ukuthi imvula izigingqikele ewindini.
Lowo muthi wakha ulwelwesi oluzishaya samafutha okuthi uma amanzi ethi ayakhela asheshe agingqike. Angiphathi-ke uma imoto isihamba aphephetheka mawala. Lo muthi usiza ngisho kuthiwa amawayipha ayasebenza esimeni semvula enkulu engathi ungahlala uwugcobile. Ugcotshwa lingakani ewindini elomile ukuze usebenze kahle.
UKHARI: Esikhundleni sokunonga isishebo uzozwa omakadebona bekutshela ukuthi uma imoto ibhobokelwe yisigubhu samanzi okupholisa injini (radiator), uboyivuvuzela ukhari/masala phakathi kulesi sigubhu. Wona-ke uyahamba uyovimba ngaphakathi lapho kuvuza khona amanzi. Kodwa-ke izazi ngezezimoto azikuncomi lokho ngoba zithi ukhari awuncibiliki kuyenzeka uhambe uyogcika izimbobo zasemathunjini enjini noma ubulale iphampu yamanzi emotweni.
UBHANANA: Kungethusile ukuzwa ukuthi kukhona abantu noma omakhenikha abathi uma uqobela ubhanana kudiff onomsindo uyanqobeka loyomsindo obizwa nge harming. Abanye bagxisha usadasi phakathi kudiff wemoto ukuze kuthule loyo msindo.
INSIPHO EYIQHUZU: I sunlight ayigcini ngokugeza imoto ngaphandle nomake ogogo bebuye bachathe ngayo abazukulu uma besola ukuthi banesela, kepha abanye abantu bayayibotoza ithambe bese benameka ngayo lapho kuvuza khona amanzi enjini. Nayo-ke leyo ndlela ayikuqhubi into etheni kodwa kuba okwesikhashana nje.
UGAVINI: Ngizwa kuthiwa uma usuphelelwe wuphethroli ungawuthela umankayinga, ugavini, umaconsana ethangini imoto idume idle amagalani. Kodwa inkinga isekutheni ugavini unamanzi lokho okungaba yinkinga kuma injektha nasezifonyweni ama filter. Amanzi awahlangani no phethroli ngakho uma esalele azobanga ukuthi imoto ihixize.
PANTYHOSE: Bazokumangaza abantu, ngesikhathi abanye beyigqoka ekhanda abanye beyenza ibhola lokudlala ushumpu noma lokubhona izicathulo. Ipantyhose bayayisebenzisa nasemotweni. Kuthiwa impela uma unqanyukelwe yi-fan belt emotweni, ungayisebenzisa i pantyhose ukuze imoto iqhubeke nokushaja nokuphendula iphampu yamanzi enjini.
Ngake ngayizama le nto kepha ngacishe ngafelwa yi seal yamafutha ngoba yavele yaphuma kulayini yayothandela ku-puller yenjini. Nayo lena iyingozi kungcono uyidonse imoto kunokuthi uthi uzama leli qhinga likufake kwenye inkinga.
PACKING TAPE: Hhayike lena iyahlukunyezwa ngempela. Empeleni ithephu eyisixebeledu ecwazimulayo yokuvala amabhokisi kukhona asebayithola ukuthi ingaba yiwindi lesikhashana.
Uma imoto ifelwe yiwindi kodwa langawohloka, bavele balibhandishe ngethephu ekhanya ngale. Umuntu uhamba aze ayobuya kude engasalifaki iwindi ngoba esethembele kule thephu. Abanye ngisho life lawohloka bavele bayenze kube yiyo uqobo esiyiwindi lesikhashana. Inkinga ukuthi iyaphazamisa ekuboneni ngaphandle futhi ibanga umsindo uma imoto ihamba.
STA SOFT: Bake basiyala abakhi balesi thambisi ndwangu ngesikhathi beletha izikhuxwana zokuzithakela ekhaya, iningi labantu lithenga le nto liyiphonse phansi kwezihlalo noma ezindaweni ezingaphazanyiswa njalo.
Onkabi laba bathi basuke benzela amakha athaphuka kulezi khuxwana. Akhona amakha ezimoto asemthethweni okufanele engabe yiwo athengwayo kodwa umuntu asukele into yokuwasha amanabukeni azoyibeka emotweni.
KIWI: Owakhombisa izinsizwa zaserenki ukuthi upholishi wezicathulo uyavuma ukupholisha amasondo wayenza indaba. Phela upholishi wawakhelwe isikhumba kodwa usuthole ikhaya lawo emasondweni, yikho nje nebhrashi liguga masinya ngoba akwakhelwanga into eqine njengenjoloba eyakhe isondo lemoto.
Hhayi-ke sesingawavala ama hazard ethu anamhlanje egameni lokuthi sikugweme ukusebenzisa izinto ezingakhelwe ukungena emotweni ngoba lokho kuyobulala ezinye izinto ezibalulekile emotweni.
Okwamanje masiqhubeke nokushayela ngokucophelela nokuphepha ukuze sihlangane sisawadla anhlamvana nangesonto elizayo kuyo le nkundla.
Uma ufisa siyixoxe le ndaba nezinye ngena ekhasini lethu likaFacebook elithi Igedlela lami with Sthembiso Shangase. Yimi owenu nali ikheli ngezansi hazardiso@gmail. com