Amasu okonga uphethroli?
ABASHAYELI bahlale bekhala ngokunyuka kwentengo kaphethroli okugcina kubaphoqa ukuthi bangene shi emaphaketheni. Ukunyuka kwentengo akuthinti kuphela abashayeli kodwa kuzwela kuwona wonke umuntu ngoba nentengo yempahla ezitolo iyanyuka.
Phakathi kukaNovemba 12 noNovemba 16 kuzoba neWesBank Fuel Economy Tour abashayeli abazothola kuyo ukuthi izimoto ezehlukene ziwudla kanjani uphethroli. Bazofunda nokuthi yiziphi izikhathi ezikahle zokuhamba emadolobheni amakhulu ukuze uphethroli ungadleki kakhulu. Kuzobe kuhanjwa emadolobheni amakhulu kusuka eGoli kuyiwa eKapa. Indlela izodllula eThekwini, East London, Port Elizabeth naseGeorge kanti izoba ngu-2 500km.
Isikhulu seWesBank, uGhana Msibi, sithe inhloso yohambo wukuthola indlela eqondile izimoto ezidla ngayo ebangeni elide futhi emigwaqweni abantu abayisebenzisayo.
IWesBank ikhiphe nanka amathiphu angasiza abashayeli ukuthi bonge.
Shayela ngobunono Ukunyathela mawala amafutha, ukugijima nokubopha kunganciphisa uphethroli wakho ngokushesha. Ngakho nyathela amafutha kahle, ubophe ngobunono futhi kusenesikhathi bese uhlala emzileni owodwa uma kuphephile. Lokhu akusizi ukonga uphethroli kuphela kodwa kuyasiza ukuthi amabhreki ahlale isikhathi eside namathayi.
Ungayishiyi imoto iduma Izinjini zamanje azidingi ukufudunyezwa. Dumisa imoto bese uyahamba. Ungayishiyi imoto iduma. Ukudumisa imoto kukhipha isisi esingcolisa umoya futhi kumosha uphethroli. Cisha imoto uma kuphephile nengesikhathi uma ume imizuzu engaphezu kwewu-30.
Khipha impahla engenaso isidingo Ukunciphisa izimpahla ozigcina ebhuthini noma ezihlalweni ezingemuva kungakusiza ukonga uphethroli ngoba kuzodingeka amandla amancane ukuhamba. Zama ukuba nezinto ezibalulekile kuphela emotweni.
Sebenzisa i-air conditioner kuthelawayeka kuphela
Indlela imoto yakho esebenzisa ngayo uphethroli yehla ngo15% uma usebenzisa i air conditioner uhamba ngesivinini esiphansi. Uma kungashisi kakhulu, cisha i air conditioner bese wehlisa amawindi. Uma kodwa uhamba ngesivinini esingu90km/h kuya phezulu, ukusebenzisa i-air conditioner yikhona okungcono kunokuvula iwindi ngoba awukho umoya otheni ongena ngaphakathi uma evaliwe.