Umphakathi uxwayiswe ngesikole
UDONSE ngendlebe umphakathi nabazali bezingane ezifunda eMnyezaneni High eMooi River, ukuthi basigade isikole uNgqongqoshe wezeMfundo KwaZuluNatal.
UMnuz Kwazi Mshengu ukusho lokhu emuva kokuvakashela lesi sikole ngeSonto.
UMshengu othembise ukuthi isikole sizoqala ukwakhiwa kabusha ngonyaka ozayo, usabise ngokuthi bazoyeka uma kwebiwa impahla noma sicekelwa phansi.
Ilinganiselwa kuR18 million imali ezobekwa eceleni ukulungisa lesi sikole ngonyaka ozayo.
Lesi sikole esike sangezinye ezihlonishwayo phambilini, kuthiwa sesiphenduke umhhume wabaphangi njengoba sekwebiwe impahla eningi, enye yacekelwa phansi.
“Izikole ziwumgogodla nesisekelo ekuthuthukiseni umphakathi. Asikho isizwe esingaphumelela ngaphandle kwempilo engcono.
“Sinxusa ukuthi umphakathi usivikele isikole. Sicele namaphoyisa ukuthi asebenzisane nathi ekubuyiseni uzinzo kulesi sikole,” kusho uMshengu.
Ngaphandle kokucekelwa phansi, lesi sikole kuthiwa sikhungethwe ukusetshenziswa kwezidakamizwa okuphezulu kubafundi.
Lokhu kuphazamise nokufunda nokufundisa kulo nyaka kanti nangonyaka odlule imiphumela ka-matric yehle kakhulu. Kuthiwa abafundi bake bathinteka nasezimpini zomphakathi, okwenze isikole singaphephi.
Okhulumela umnyango KwaZulu-Natal, uMnuz Sihle Mlotshwa, uthe lesi sikole sizoqashwa ngelokhozi uma kuvulwa ngonyaka ozayo.
“Inhloso yokuhlangana nomphakathi ngeSonto bekuwukuqinisekisa ukuthi uzosigada isikole. Sinethemba lokuthi umphakathi uzwile futhi uthembisile ukuthi uzobambisana nomnyango ukubuyisa uzinzo kusona.” “Ungqongqoshe ugcizelele ukuthi ngeke kuqhutshekwe nokwakhiwa kwesikole uma kuke kwaphinde kwebiwa impahla noma yacekelwa phansi,” kusho uMlotshwa. Kwenzeka lokhu nje, ungqongqoshe phambilini wamemezela ukuthi ngeke zisabekwa eqhulwini izikole ezicekelwe phansi wumphakathi ngenxa yemibhikisho. Ecacisa ngalokhu ungqongqoshe, uthe lesi sikole sacekelwa phansi kudala, singakakhishwa lesi sinqumo.
THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.