UBuchanan nesicelo esibalulekile kwabaseKZN
UMDLALI weMaritzburg United uKeagan Buchanan, unesicelo esibalulekile kubalandeli bakanobhutshuzwayo bonkana KwaZulu-Natal.
Emuva kokuxebula iKaizer Chiefs ngo 2-1 kowandulela owamanqamu kwiTelkom Knockout (TKO), iTeam Of Choice iziphendule igugu kulesi sifundazwe ingena kowamanqamu kwiTKO.
Iqembu elagcina ukunqoba isicoco eKZN yiLamontville Golden Arrows ngo-2009 eyadla eseMTN 8 ibhaxabula kabuhlungu i-Ajax Cape Town ngo 6-0, e-Orlando Stadium.
I-Maritzburg isethubeni lokukhala yemuke nesicoco seTKO kodwa lokho kusho ukuthi kufanele ishaye iMamelodi Sundowns, emdlalweni ozoba ngoMgqibelo eMoses Mabhida Stadium ngo-6 ntambama.
UBuchanan utshele izintatheli izolo ukuthi balindele ukuthi isifundazwe siphume sonke, sime nabo, sibaseke.
“Sesifikile manje kowamanqamu, besingenzeli nje thina kuphela kodwa besenzela idolobha iMaritzburg nesifundazwe sonke. Siyakujabulela kakhulu ukuthi ekhaya sesekwa kakhulu, empeleni nezibalo ziyakusho lokhu nxa sidlalela ekhaya. Sizolwa, sizobe silwela ukuthi iKwaZuluNatal ithole isicoco. Siyazi lokhu sekunesikhathi kwagcina ukwenzeka kodwa uma sesekwa, yonke into ingenzeka,” kusho uBuchanan.
Eqhubeka echaza uthe uyazi ukuthi kulesi sifundazwe kunabalandeli abazifelayo ngamaqembu aseGauteng, wathi nokho uyacela ukuthi kulo mdlalo beseke iqembu lakwabo.
“Siyazi ukuthi kunabalandeli beChiefs, Sundowns noma be-Orlando Pirates kodwa siyacela ngoMgqibelo bacime ihlo, beseke thina. Okuhle kakhulu ukuthi uma singanqoba, nabo bazohamba bevule izifuba besho ukuthi iqembu lakwabo eKZN lingompetha beTKO. Sifuna ukuthi iKZN iziqhenye ngathi,” kuqhuba uBuchanan.
Ziya kulo mdlalo nje iMaritzburg ishaye iPolokwane C ity ngo 1-0 emdlalweni we-Absa Premiership obungempelasonto. AmaBrazilians wona ahambela phezulu emuva kokudlala ngokulingana ngo 0-0 bebhekene nezinkunzi zaseMorocco iWydad Casablanca koweCAF Champions League ekuhambeni.
“Siya empini, hhayi ukuthi siyolwa ngezandla kodwa siyolwa enkundleni. Yebo, hleze siya kulo mdlalo akekho obheke ukuthi sinqobe, futhi sidlala neqembu elinesipiliyoni sokunqoba izicoco kodwa kowamanqamu kungenzeka noma yini. Ngikholelwa ekutheni uma umuntu ezokwenza akutshelwe ngumqeqeshi, sizonqoba noma yinkanjani,” usho kanje uBuchanan.