Okuhle nokubi kuvulwa izikole
USUKU lokuvulwa kwezikole zasemalokishini kusetshenziselwe ukubhalisa. Abazali abanezingane okukhokhwayo kuzo abangazange bayikhokhe imali yesikole nyakenye bebengena bephuma emahhovisi othishanhloko bezocela ushwele abanye benza izinhlelo zokuthi bazokhokha kanjani.
ENqabakazulu Comprehensive High, KwaMashu, abafundi bakhona bafike bangena emakilasini bafunda, imithonseyana ebihamba nabazali ibisashaye ujenge ehhovisi likathishanhloko izogcwalisa amafomu okuthi umzali uyehluleka wukukhokha imali eligcwaliswayo ukuze umfundi akwazi ukuthola izinsiza kufunda.
Leli fomu ligcwaliswa ngaphambi kokuthi kuvalwe izikole ukuze umfundi athi uma efika ngonyaka olandelayo athole izinsiza kufunda zakhe angene ekilasini kodwa abanye abazali bafike izolo okuholele ekutheni izingane zabo zingafundi, zime nabo kolayini kusalungiswa udaba lwabo.
UNksz Nonhlanhla Biyela ofundisa uGrade 12 kulesi sikole uthe efika wabe eqala ukufundisa iGeography ngoba ethi usuku lokuqala esikoleni akumele lulahleke.
Uzakwabo uNkk Pepsi Khumalo naye ubesekilasini kwaGrade 10 efundisa, echazela abafundi ukuthi kubaluleke kangakanani ukuthi bazijwayeze ukufunda izincwadi namaphepha ngoba lokhu kuzobasiza ukuthi bandise ulwazi.
Isikole esiwumakhelwane walesi sikole eMzuvele High bekungafundwa, abafundi beme izixongololo esangweni, abanye beme ngaphakathi egcekeni. Abanye bebehamba nabazali abanye beme ulayini bethi ima besazobhalisa.
Omunye wabafundi okhulume naleli phephandaba, uthe kufunda labo abathandayo ukufunda abangathandi abenziwa lutho.
Uma ebuzwa ukuthi yena kungani engangenanga ekilasini, uthe usafuna ukubona ukuthi bonke abangani bakhe babuyile yini esikoleni.
Abanye abazali ubuhlangana nabo bethetha bethi abalutholi usizo abaludingayo.
Iphini likangqongqoshe wezeMfundo kuleli uDkt Makgabo Mhaule nozakwabo KwaZulu-Natal, uMnuz Kwazi Mshengu bavakashele eHavenpark Secondary, ePhoenix.
Lesi sikole sithole imiphumela ka-matric emihle kunazo zonke ezingaphansi kwesekethe iPhoenix North.
UDkt Mhaule uthe usuku lokuqala esikoleni lubaluleke kakhulu futhi bonke abafundi kumele baqale ukufunda ngalo usuku lokuqala.
Unxuse abafundi ukuthi bazimisele ngomsebenzi wabo kube sengathi bazobhala izivivinyo zabo ngakusasa.
Uqhube wathi kubalulekile ukuthi abafundi bazifundise ukufundela ukuqonda ngoba kunenkinga yabafundi abakwaziyo ukufunda kodwa abakuqondi abakufundayo.
UMshengu uthe izinto ezimbi abafundi abakhuzwa kuzo kusuke kwenzelwa ukuthi bakhule babe ngabantu abangcono akukhona ukuhlukunyezwa.