Abe-ANC bakhala ngebheyili enikwe iphoyisa

AMALUNGU e-ANC eMshwathi ngaseMgungundlovu asola inkantolo ngokuchema nephoyisa elibhekene necala lokubulala obeyilungu lekomiti le-ANC Youth League KwaZulu- Natal

INkantolo yeMantshi yaseNew Hanover inike uConstable Sandile Mkhize (31) ibheyili kaR4 000 izolo ngecala lokubulala uNksz Sindisiwe Ndlovu (34).

Imantshi, uRod Stewart, ilihlehlisele uFebhuwari 18 nonyaka icala. UMbuso kawusiphikisanga isicelo sebheyili sikaMkhize. Eminye yemibandela yebheyili yakhe wukuba ayosayina esiteshini samaphoyisa kabili ngesonto, angahlangani nofakazi futhi angalubhadi eMshwathi lapho okwenzeka khona isigameko.

Amalungu e-ANC abesecaleni aphatheke kabi ngokukhululwa kukaMkhize, asola inkantolo ngokuchema “nombulali”.

Ilungu lesigungu seSanco eMgungundlovu, edlelana ne-ANC, uMnuz Muzi Mngadi, lithe badumele ngesenzo senkantolo sokungakhombisi ubulungiswa ikhipha uMkhize ngebheyili.

“Abantu besifazane bafela ezandleni zabantu okumele ngabe bayabavikela. Kubi kakhulu kulesi sigameko ngoba umsolwa yiphoyisa elibulale uNksz Ndlovu ngesihluku esimangalisayo. Umndeni kamufi nengane yakhe basezinhlungwini kodwa inkantolo ibone kungcono ikhulule umbulali. Okusikhathaza kakhulu wukuthi icala liphenywa wuzakwabo kamsolwa esiteshini saseCrammond, engabe liphenywa i-Ipid (ephenya amacala amaphoyisa). Sihlela ukumashela ezindlini zoMbuso eMgungundlovu siyoveza ukuthi kaseneme ngendlela okusingethwe ngayo leli cala.”

UMkhize, uyiphoyisa eCrammond, usolwa ngokudubula unina wengane yakhe, uNksz Ndlovu, esifubeni besendaweni yobumnandi ayembizele ukuthi baxoxe kuyona esebenzisa isibhamu somsebenzi.

Emva kokumdubula, kuthiwa walayisha uNksz Ndlovu emotweni yakhe ethi umphuthumisa esibhedlela kanti uzoshonela endleleni.

Isithombe: BONGANI MBATHA/AGENCY (ANA) INGXENYE yamalungu e-ANC angeneme ngesinqumo senkantolo enike ibheyili iphoyisa elisolwa ngokubulala ilungu lekomiti le-ANCYL eKZN, uNksz Sindisiwe Ndlovu, ngoDisemba nyakenye