Kudutshulwe usomabhizinisi odumile
UFUNA ubulungiswa umndeni kasomabhizinisi odutshulwe ngaphandle komuzi wakhe KwaMbonambi.
UMnuz Emmanuel Sibusiso “Mbuso” Mthethwa, ongusomabhizinisi owaziwayo eRichards Bay naseGoli uhlaselwe ngeledlule ngoLwesithathu kade esalinde indodana yakhe imvulele isango.
Kuthiwa udutshulwe ngoyaba lwezinhlamvu ngabantu abangaziwa.
Lo somabhizinisi wasungula iLanga Electrical neGrabe Electrical.
Uphinde abe yilungu labezithuthuthu iThe Harley Davidson Club (HOG).
Indodana yakhe uMnuz Ndumiso Mthethwa, ithe umndeni ufuna kuboshwe abenzi balesi sigameko ukuze bezothola isizathu sokubulawa kukayise. “Esikufunayo wubulungiswa nokuthi kuboshwe ababulali bakababa,” kusho uMthethwa. Elandisa Isolezwe uthe uyise wayehambile eye komunye umuzi wakubo eBirdswood futhi ezolanda indodana yakhe uVela (12). Uthe bafika ngabo3 ntambama, uVela wabe eseyovulela uyise isango ukuze ezongena. “Kukhona owavele waqhamuka ehlathini wadubula ubaba amahlandla amane wabe esebaleka. UVela wabe eseyobika kubabomkhulu ngosekwenzekile. Umndeni wonke wazama ukuthinta i-ambulensi ngokushesha kodwa yafika eseshonile,” kusho uMthethwa. Kunezinsolo ezithi
THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. ukuhlaselwa kwakhe kuhlobene nombango wenkontileka kagesi kwenye yezimayini okuthiwa umufi wuyena obewazi kakhulu lo msebenzi futhi eqasha nabanye abantu kulo mkhakha.
Umndeni uthe yize kunezinsolo ezikhona kodwa ufuna ziqedwe wukuthi kuboshwe abasolwa ukuze kuzovela ukuthi kungani ebulewe umufi.
Okhulumela amaphoyisa KwaZulu-Natal, uColonel Thembeka Mbele, uthe kuphenywa icala lokubulala esiteshini saKwaMbonambi.
“Amaphoyisa abizwa endaweni yaseMakhandeni, endaweni yesigameko afica isidumbu sowesilisa oneminyaka engu-53 sisemotweni. Kwatholakala ukuthi udutshulwe esifubeni. Kusaphenywa akekho osaboshiwe,” kusho uColonel Mbele.
Umufi kulindeleke ukuba afihlwe ngoMgqibelo KwesakwaMthethwa.