Umndeni wawungayizwa eyokusebenza phesheya
UBUNGAYIBONI kahle indaba yokusebenza kwakhe phesheya umndeni womcwali wezinwele osetetemuka ngemikhumbi ehambela amazwe.
Umndeni kaNksz Zinhle Ngcobo (34) wase-Elandskop, eMgungundlovu, wawusaba ukuthi kungenzeka ukuthi uholelwa Ophathe ngezibo lomsebenzi ngenxa yokuthi sekwande ukushushumbiswa kwabantu. Uzobe eqala unyaka wesithathu ngenyanga ezayo esebenza enkampanini yemikhumbi iCarnival Cruise Line ezinze eMiami, e-USA.
UNksz Ngcobo, owafundela ukuba yiHairdresser eThekwini College, usebenza enkampanini yokucwala i-One Star World enamagatsha emazweni ahlukene.
“Ngaqala ngisebenza njengomsizi wabacwali bezinwele endaweni yokucwala eLiberty Mall. Kwagcina kungingena ukuthanda ukucwala izinwele namakhasimende angikhuthaza ukuthi ngiyofunda. Bengingaziboni ngiphumelela kulo msebenzi ngoba bengingenayo nemali yokufunda. Ngaqongelela imali yokubhalisa eThekwini College, okuthe sengiqeqeshelwa umsebenzi ngabeka enye imali ngoba bese sihola, ngaqedela ukukhokhela ukufunda,” echaza.
UNksz Ngcobo akakwazi ukucwala izinwele zabantu abamnyama ngoba waba nebhadi lokufika ekolishi engasekho ofundisa ngazo. Wasala eseqhubeka nokufunda, okumanje wenza kuphela izinwele zezinye izinhlanga. Uthe kumphatha kabi lokhu kodwa uzimisele ukufunda ukucwala izinwele zabantu abamnyama.
Emkhunjini asebenza kuwo kunabantu bobuzwe obuhlukene ka-54. Uma befika bayaqeqeshwa ukuthi bahloniphane ngoba bonke bayizihambi. Isikhathi esiningi usichitha emkhunjini ahamba ngawo izinyanga eziyisishiyagalolunye.
Uma umkhumbi usechwebeni bathula ithuba lokwehla kuwo kathathu ngenyanga. Emkhunjini kunendawo yokucwala izinwele nokubhucunga umzimba asebenza kuyo.
“Kukhona ngisho izivakashi ezisuke zifuna ukwenziwa izinwele ngoba zizoshadela khona emkhunjini. Uyangijabulisa umsebenzi wami ngoba ngihambela amazwe, noma kuyinkinga ukuqonda ezinye izilimi. Ayikho into engijabulisa njengokubona ikhasimende selijabulile seliqede ukwenza izinwele.”
Uthe ulimi olukhulunywa kakhulu emkhunjini ngolwaseSpain asezama ukulukhuluma. Ngale kwalokho azikho izinselelo zokushintsha kwesimo sezulu ngoba isikhathi esiningi uhlala emkhunjini. Naye ubenovalo eqala ukusebenza phesheya kodwa uthe bekumele acabangele izingane zakhe ezimbili okudingeka azondle. Njengoba ezoqala umsebenzi ngenyanga ezayo uyoze abuye ngo-Okthoba.
Wangena emsebenzini emuva kokuba kufike isikhulu sakwa-One World Star sizochaza ngomsebenzi.
Kuthe eseqedile ukufunda wafaka isicelo ezama inhlanhla kanti uzothathwa. Akuthanda ngokusebenzela phesheya wukuthi maningi amathuba okukhula. Usekwazi nokucwala ubuso kwabesilisa, ahlanze amazinyo ashayele nesikebhe esincane iLife Boat. Ufisa ukuba nebhizinisi lakhe lokucwala uma esenamava anele.