OweRise FM ufuna ukukhula endimeni
UFUNA ukusakazela imisakazo emikhulu umsakazi osemncane weRise FM uNtuthuko Hlabisa.
Le nsizwa yaseQhunwane, KwaHlabisa, ithi yangena emsakazweni ngoba iwuthanda kwazise abasakazi bakwazi ukubeka umuntu endaweni asuke engekho kuyo ngamaphimbo abo.
“Uma ulalela umsakazo ngisho ulapha eMtubatuba uzibona useThekwini, uma abasakazi sebelichaza kahle iTheku ukuthi liyindawo enjani.
“Nami ngiyathanda ukuthatha abantu ngibabeke kwelinye izwe ngephimbo lami. Kukhona nabasakazi abaneziyalo ezakhaya engingabala kubo uTshatha (Khathide Ngobe) woKhozi FM noNjinji naye osoKhozini ngoba uyayidedela ingoma,” kusho uNtuthuko.
Uthe uyabathanda kakhulu abasakazi abasebenzisa udumo lwabo ukwakha isizwe nokufukula izindawo abavela kuzo.
UNtuthuko usakaza uhlelo olubizwa ngeVuka Sakhisizwe olungena ngo12 kuya ku-3 ntambama ngoMgqibelo nolubizwa ngoMkhumbi Wokunethezeka olungena ngo-12 kuya ku-3 ntambama ngoMsombuluko kuya kuLwesihlanu.
Ufunde eNyuvesi yaseZululand lapho enze khona iziqu zeMedia Studies.
Uthe wenze lezi zifundo ngoba efuna ukuba wumsakazi eziteshini ezihlukene.
“Ngiyaqala ukusakaza lapha kwiRise FM kodwa iphupho lami wukukhula ngize ngingene emisakazweni emikhulu. Ngifuna ukusebenzisa udumo lwami ukugqugquzela abantu abasha ngiphinde ngibakhe ngocwaningo engizobe ngilwenza uma ngisakaza.
“Abasakazi bayacwaninga ngaphambi kokukhuluma emsakazweni futhi yibona ababonisa umphakathi indlela eyiyo ngalokho abakukhulumayo,” kusho uNtuthuko.
Ugqugquzele abantu abasha ukuthi bazimisele kulokho abakwenzayo ukuze kufezeke amaphupho abo.
“Ngifisa ukutshela abantu abasha ukuthi akulula ukungena emisakazweni nakweminye imisebenzi ngoba mina ngangena lapha emuva kokuhambela inhlokhono yize ngineziqu zasenyuvesi. Kubalulekile ukuthi sibekezele, senze izifundo ezizosisiza kulokho esifisa ukukwenza ngomuso,” kusho uNtuthuko.