Makubuyekezwe indlela yokufundisa iMaths
AAKE ngiphefumule ngeMathematics, isibalo sabafundi abayenzayo kwaGrade 10-12 esikhombisa ukwehla. Lokhu kuyadumaza futhi kubeka nezwe engcupheni ngamakhono nasekuthuthukeni.
Isibalo sabafundi abathatha i-Accounting ne-Economics siyehla. Kungenzeka ukuthi isinqumo esathathwa wuMnyango weMfundo eyisiSekelo sokungaphoqi abafundi abenza izifundo zomnotho ukuthatha iMathematics sinomthelela. Mhlawumbe i-Economic and Management Sciences kunomthelela. Nokuvalwa kweMaths ne- Accounting ngezinye izikole kuyadumaza. Sizoncintisana kanjani namanye amazwe uma izingane zigijimela koMathematical Literacy? Sikhuluma nge-4th Industrial Revolution (4IR) edinga iMaths.
Kubuhlungu ukubona umfundi enze kahle kuGrade 12 kodwa kuthiwe esikhungweni semfundo ephakeme ngeke sikuthathe ngoba wenze iMaths Lite. Iyawavala amathuba. Ubheka koHumanities nakwiLaw uma uneMaths Lite. Ezinye izikhungo zikufaka ohlelweni lokulungisa iMaths le oyibalekekile esikoleni noma kuthiwe hamba uyoyifunda ubuye ngonyaka ozayo.
Uma singashintshi ukwenza siyizwe kwiMaths siyohlale sihlekwa ngamanye amazwe. Siyolokhu siyibambe emsileni ekuklelisweni kwamazwe. Singabazali sithule sithini, senzani? Sabulala izingane zethu sibhekile. Masibe neqhaza ekukhetheni izifundo zabantwana bethu. Sihlele nosizo uma eludinga umntwana. Umntwana obuthaka kwiMaths angayithatha iMaths Lite. Siqaphele singadluliseli ukusaba iMaths kubantwana. Masikhulume kahle ngayo.
Masishintshe indlela esifundisa ngayo iMaths. Masifunde kwamanye amazwe kodwa masiziqhamukele nathi nezethu izindlela azihlabahlosile ezinokuchule nobunyoninco. Sidinga izinsiza kufundisa zeMaths. Wubani owathi kayidingeki iMaths laboratory? Lapho kungagcinwa izinsizakufundisa futhi nabantwana bafundele khona.
Angiphuphi, ngikhuluma ngento engiyaziyo. Wawazi nje ukuthi iMaths iseBhayibhelini, emgwaqweni nakithina bantu?
Luke 6:29 - Okushaya esihlathini mnike nesinye, Matthew 5:39 - Kepha mina ngithi kini: Ningamelani nokubi. Kodwa uma umuntu ekumukula esihlathini sokunene, mphendulele nesinye.
KwiMaths kuma-Equations, okwenza esandleni sokunxele kwenze nasesandleni sokudla.
Johan19:18 - Bambethela khona nabanye ababili ngalapha nangalapha, uJesu ephakathi. Izenzo 4:10 - Ngegama likaJesu enambethela esiphambanweni.
KwiMaths isiphambano sisisebenzisa ukudweba nokuhlaziya ama-graphs. Izimpawu noma izinkombandlela ezisetshenziswayo emgqwaqweni iGeometry efundwayo ezikoleni, njengonxantathu, ndingilizi, nxande, nxanhlanu, nxasithupha, olayini, ama-engela nokunye.
Uma uthisha efundisa i-number line angasebenzisa izingalo nekhanda, isandla sokudla simele ama positive (+) numbers, isandla sobunxele simele ama negative (-) numbers bese ikhanda limele u-zero (0) ngoba liyiphoyinti eliphakathi nendawo (neutral point).
Makuqalwe iqembu leMaths ngaphakathi esikoleni. Ngalokho, abafundi bathola okuningi okufana nemihlomulo, kubalwa isinezelo sokufundiswa nokuthola usizo kumeluleki. Futhi inikeza abafundi ithuba lokulalela izinkulumo ezakhayo zingethulwa ngamamathematicians, statisticians, accountants, engineers, nabanye abasebenzisa iMathes emisebenzini yabo.
Iqembu leMaths lingahlela inhlanganisela yolwazi lweMaths ukukhuphula ucwaningo ngabaqambi nabasunguli bezinto ezitholakala kwiMathematics, umqhudelwano weMathematics mhlawumbe izinkondlo, amaculo, izindaba ezilotshiweyo, umdlalo weshashalazi, iphepha elinezimpawu nezinhlamvu zeMaths ukukhombisa usitshele nge-Mathematics, ama-vide nokucela uxhaso lwezimali eziphathelene nohambo lwabafundi oluthinta i-Maths. Leliqembu lingahlela futhi i“Love Mathematics Day” lapho abafundi bekhombisa uthando ngayo futhi bakhombise uthando ngeMathematics usuku lonke. Kungamenywa ngisho abazali ngalolu suku khona kuzokwanda ukukhuluma kahle ngeMaths emakhaya nakwezinye izindawo zomphakathi.
USolwazi Mkhize ufundisa i-Accounting eSikoleni sokucwaningwa kwamabhuku ezimali, ezomnotho nezezimali e-UKZN