Ugqugquzela abamnyama ukuthenga izincwadi
UKHALA ngokugqoza kwabamnyama abathenga izincwadi umdayisi wasemgwaqweni, ongomunye wabenze imali engaphezu kukaR20 000 ngokuzidayisa ngamaholidi kaKhisimusi ebhishi.
UMnuz Vusi Meyiwa (40) waseMlaza, uthe ubevele ekuthanda ukufunda izincwadi, okwenze wakujabulela ukuthola ithuba lokuzidayisa emgwaqweni, kusukela ngonyaka odlule.
Waqala ngo-Okthoba emuva kokutshelwa ngalo msebenzi ngumngani wakhe obevele esewuqalile.
“Umngani wami wanginikelela ngezincwadi ezingu-120 ngaqala ukudayisa. Bengingasebenzi kodwa bengibamba amatoho abebuye aphele. Bengihleli ekhaya ngesikhathi ngizwa ngalolu hlelo. Kuthe sengiqale ukudayisa izincwadi emgwaqweni, ngabona ukuthi kuyaphileka,” echaza uMeyiwa.
Uthe ukubiza kwencwadi kuya ngokuthi iwuhlobo luni kodwa ziqala kuR10. Ukhale ngokuthi ngabelungu nezivakashi kuphela abathenga izincwadi.
Lokhu kuyamkhathaza ngoba kusho ukuthi kuyiqiniso ukuthi abamnyama abakukhonzile ukufunda. UMeyiwa uthe usefisa nokudayisa emigwaqweni yaselokishini, ukutshala uthando lokufunda izincwadi.
Naye uyafisa ngelinye ilanga ukubhala eyakhe incwadi njengoba ethi unesiphiwo sokubhala izindatshana. UMeyiwa ungomunye wabane abasizwa yisikhungo samakholwa, iDennis Hurley Centre (DHC), eThekwini. Lesi sikhungo sixhaswa nayi-Unesco namabandla ahlukene ngezincwadi bese sizinikezela kubadayisi.
Laba badayisi bebenikezwe imvume yamasonto amabili yokudayisa izincwadi ebhishi, ngamaholidi kaKhisimusi, badayisa ezingaphezu kuka-1 000. Kukhona nabahlala emgwaqweni ngokohlelo olubizwa ngeStreet Lit Project.
Omunye wabadayisi, uMnuz Richard Nzama, uthe uyamangala ngendlela olwesekwe ngayo lolu hlelo. Ungomunye wabebehlala emgwaqweni. Uthe usethole nabanye abacele ukuthi baqale uhlelo lokusiza abahlala emgwaqweni eGoli.
OnguMqondisi weDHC, uMnuz Raymond Perrier, uthe ukuphumelela kohlelo ngamaholidi kukhomba ukuthi abantu kabathandi ulwandle kuphela kodwa bayakujabulela nokufunda khona.
UPerrier obuye abe ngusihlalo wekomiti labahlala emgwaqweni eThekwini, uthe bafisa uhlelo lwezincwadi lukhule, bathole nezinye izindawo abangadayisela kuzo ebhishi.
Ubonge iPhini leMeya yeTheku, uNkk Belinda Scott, athe libasizile ukutholela abadayisi imvume ebhishi.