Owe-Arrows uzoyilungisa ngeCity eyamagoli
UMGADLI weLamontville Golden Arrows, uKnox Mutizwa, uzisola yena ngokudlulwa endleleni emjahweni oshisayo wesicoco samagoli, i-Absa Premiership Top Goal Scorer Award.
UGabadinho Mhango we-Orlando Pirates noBongi Ntuli yibona abawuholayo lo mjaho ngamagoli angu-10 emunye. Unyaka u-2019 uvalwe kushosholoza uMutizwa waseZimbabwe noPeter Shalulile waseNamibia oyibamba kwiHighlands Park ngayisishiyagalombili emunye.
Nokho kusukela kuqale unyaka u-2020 uMutizwa akayazi inethi. UMutizwa uveze ukuthi isifiso sakhe wukuhamba ezinyathelweni zabanye abagadli baseZimbabwe abakhale bemuka nomklomelo wamagoli okukhona kubona uKnowledge Musona noWilfred Mugeyi. Kodwa ubalise ngokuzenzela phansi ngokuhlulwa yizimbuzi zamagoli emidlalweni yakamuva.
“Kunzima njengoba ubona wonke umuntu ulisebenzela kanzima iqembu lakhe. Ngicabanga ukuthi abagadli bayayishaya inethi kule sizini. Uma ngithola ithuba lokudlala ngizozama ngakho konke ukushaya amagoli ngilandele ezinyathelweni zabo ngidle umklomelo wamagoli ekupheleni kwesizini. Ngizoqhubeka nokusebenza, ngithathe umdlalo ngamunye. Okwamanje ngisekahle esibalweni samagoli engizibekele sona nakuba ngidlale imidlalo emithathu ilandelana ngingalishayi igoli. Kule midlalo ezayo kufanele ngishaye igoli noma amabili ukuze ngizofica abanye. Ngicabanga ukuthi kuzoba wumjaho omuhle,” kusho uMutizwa.
“Ngibona ngizenzele phansi kweminye imidlalo ngoba kukhona amathuba engiwagejile. Uma sengibuka kwithelevishini ngiyakubona obekufanele ngikwenze ukuze ngilishaye phakathi. Ngiyayizwa ingcindezi yokuthi ngizenzela phansi kwesinye isikhathi. Kodwa kufanele ngizitshele ukuthi uma ngiziqeqesha ngiyayenza ilunge le nto. Ngiyageja ngiwashaye amanye.”
Amathemba e-Arrows azophinde ahlale kuMutizwa uma isivakashela iPolokwane City emdlalweni wePremiership, ePeter Mokaba Stadium, ngeSonto ngo-3.30 ntambama. UMutizwa uzobhekana nomqeqeshi uClinton Larsen onguyena omlethe eNingizimu Afrika esaqeqesha Abafana Bes’thende.
“Kunzima ngoba uyena ongilethe lapha futhi ungumqeqeshi omuhle kimina. Ngaso sonke isikhathi ngimzwela ubuhlungu uma elahlekelwa wumsebenzi nokunye. Kuzoba buhlungu kodwa kulungile ngoba sonke sizobe sisemsebenzini. Sizoncokola ngaphambi komdlalo noma usuphelile, hhayi uma kusadlalwa. Lo mdlalo ubalulekile kithina. Asenzi kahle emidlalweni yasekuhambeni. Uma siwuwina uzokwenza sivule isikhala emaqenjini angaphansi,” kusho uMutizwa.