AbeZinyoni balwela imiholo ephelele
ISALOKHU ibambene ngezihluthu phakathi kwabaphathi beSwallows FC nabadlali mayelana nodaba lokunqanyulwa kwezinkontileka zabo.
Isolezwe lithole ukuthi kuze kube yimanje kaluxazululeki udaba lokunqanyulwa kwezinkontileka zabadlali abawu11 okwenzeke ngasekupheleni kwesizini eyedlule.
Ukuchithwa kwalaba badlali kwenzeke ngemuva kokuba kufike uBrandon Truter obevela kwiRichards Bay FC okhale ngokuba kugcwele uvucu. Phakathi kwabo kukhona uThapelo Tshilo odlala emuva oke wadlala kwiBidvest Wits nakwiPolokwane City, Tebogo Sodi, oke wayibamba kwiBaroka, Sidney Motshweni, oke wathi qu kwiSuperSport United, Sipho Sibiya noMthokozisi Shwabule.
Umthombo uthe okucika kakhulu abadlali wukuthi izikhulu zeZinyoni zifuna ukunxephezela abadlali ngokubakhokhela izinyanga ezimbili kuphela ekubeni iningi likhonjwe indlela ngoOkthoba wanyakenye lisasalelwe yizinyanga eziyisithupha kuya phezulu. Ngokusho komthombo okudida kakhulu wukuthi phezu kokuba izikhulu zinqaba ukukhokhela laba badlali imali yezinyanga abazifunayo kodwa kusukela ekupheleni kukaOkthoba (okunqanyulwe ngawo izinkontileka) kuya ekupheleni kukaDisemba laba badlali bayayithola imiholo yabo phezu kokuba behleli ekhaya.
Lolu daba kuthiwa selungenwe yinyunyana yabadlali iSouth African Football Players Union (Safpu).
“Nathi noma singangene kulolu daba kodwa iyadida indaba yokukhokhelwa
kwamajita imiholo yabo kusukela ngo-Okthoba kuze kube uDisemba ekubeni izikhulu zingayizwa eyokukhokhela abadlali izinyanga ezine. Sifuna ukubona ukuthi ekupheleni kukaJanuwari bazoholelwa yini. Okubuhlungu wukuthi wonke la majita ahleli emakhaya, ngigcine engekho osethole umsebenzi,” kubeka umthombo.
USipho Xulu oyisikhulu esiphezulu seZinyoni ukuqinisekisile ukuthi ibambene ngezihluthu mayelana nesibalo sezinyanga abadlali abafuna ukunxeshezelwa ngazo.
“Kuliqiniso konke okubuzayo. Yikona nje ukuthi okwamanje ngeke ngande ngoba udaba lusingethwe yinyunyana yabadlali. Sinethemba ukuthi maduze luzoxazululeka udaba,” kusho uXulu.
UCalvin Motlaung weSafpu ukuqinisekisile ukuthi udaba selungenwe yibo kanti sebeke bahlangana nezikhulu zeSwallows. Uthe kudlalwa ngabadlali uma kuthiwa bazokhokhelwa izinyanga ezimbili kuphela ekubeni besasalelwe yinqwaba yezinyanga.
Lesi sikhulu sidalulele Isolezwe ukuthi ezinsukwini batshelwe yilaba badlali ababamele ukuthi iSwallows isibanikile amaphepha abakhulula ukuyodlala kwamanye amaqembu.
“Kasilwi nokunqanyulwa kwezinkontileka zabo kodwa phela mabanxeshezelwe njengoba kwenzeka kuyona yonke imisebenzi,” kubeka uMotalung. Njengamanje iSwallows isendaweni yesihlanu ngamaphuzu awu-27 emuva kwemidlalo ewu-17.
Imiphumela yeChampionship yayizolo: Ajax Cape Town 0-1 TS Sporting; Mbombela United 0-0 TS Galaxy
Real Kings v Steenberg United (Chatsworth Stadium); JDR Stars v TS Galaxy (Soshanguve Giant Stadium); Pretoria University FC v Free State Stars
(ABSA Tuks Stadium); Swallows FC v Jomo Cosmos (Dobsonville Stadium)
Royal Eagles v Cape Umoya United (Harry Gwala Stadium);
Tshakhuma Tsha Madzivhandila v Mbombela United (Thohoyandou Stadium); Richards Bay v Uthongathi FC (Umhlathuze Sports Complex)