Injabulo kwenyuswa imali yonompempe
INJABULO konompempe abadlalisa kwi-ABC Motsepe League kunyuswa imiholo yabo. Lezi zindaba ezehla kuhle koju konondweba Isolezwe lizitshelwe nguKwenzokwakhe Ngwenya ongusihlalo weSafa KwaZulu-Natal.
Uthe lesi sinqumo sithathwe emhlanganweni nabanikazi bamaqembu nabo onompempe obungeledlule eThekwini.
Uveze ukuthi kube wumhlangano omuhle njengoba kugcine kuvunyelwene ngokuthi ngosuku lomdlalo iqembu ngalinye selizokhokha uR750. Ngeke kusaba uR375. UNgwenya uveze ukuthi empeleni ngabanikazi bamaqembu abaqhamuke nalo mbono. Uthe bakubeke kwacaca ukuthi ngalokhu bahlose ukwehlisa izinga lokugwazelwa konondweba okugcina kukhanda umsindo ongenasidingo.
Uthe nokho kuvunyelwene ngokuthi ukunyuswa kwale mali kuqale ngesizini ezayo. Kuzothi uma sekusele imidlalo eyisithupha ngaphambi kokuphela kwesizini iqembu ngalinye likhiphe uR500.
“Empeleni ngabanikazi bamaqembu abaqhamuke nalesi siphakamiso. Sibonga kakhulu ngalokhu. Sinethemba lokuthi lizohlika kakhulu izinga lokugwazelwa konondweba. Lokhu kugwazelwa konompempe kusishaya kakhulu uma sekudlalwa emidlalweni yokuhlungela ukunyukela kwiNFD. Labo nompempe abagwazelwayo basuke bengasekho. Kulokhu nginethemba lokuthi likhona iqembu laKwaZuluNatal elizonyukela esigabeni esingenhla,” kubeka uNgwenya.
Uthe okunye okubajabulisile ukuzwa ngabanikazi bamaqembu bencoma ukunyuka kwezinga lokudlalisa lonompempe.
“Ngaphandle kokuhlangana nabanikazi bamaqembu, siphinde sahlangana eceleni nabo onompempe. Ukuze baqonde imithetho emisha yokudlalisa, sivumelane ukuthi zingapheli izinsuku eziwu-30 ingazange ibanjwe i-workshop. Kusithokozisile ukuzwa abanikazi bamaqembu bencoma. Okunye okusithokozisayo ukuthi sehle kakhulu isibalo samacala. Uma ngingenzi iphutha, sisaqule icala elilodwa kanti akekho noyedwa kule sizini unompempe okuthiwa ushayiwe,” kuqhuba uNgwenya.
Ngasekupheleni konyaka odlule Isolezwe libikile ngeemail eyathunyelwa uBright Gumede ongusihlalo wekomiti lemiqhudelwano kwiSafa KwaZulu-Natal ebanikazini bamaqembu nakonompempe, ebazisa ukuthi uzwile ukuthi ziyaqhubeka izenzo zokugwazelana. UGumede wabe esekhwela edilika emaqenjini ngokungacebi abenzi bobubi.
Waxwayisa abenza lokhu ngokuthi uma beke babanjwa bazojeza kanzima. Waveza nokuthi lo mkhuba yiwo oxosha abaxhasi ukuzofaka imali kulesi sigaba.
NoNgwenya unxuse ukuba bacetshwe abenzi bobubi kuzona zonke izinhlangothi Ihlelwe kanje imidlalo ye-ABC Motsepe: NgoMgibelo ngo-1 emini Movers v Qwabe United ( FNB Wadley Stadium); KwaDabeka Sporting v Durban Stars (KK Stadium).
Ngo-3 ntambama: Edendale Juventus v Zululand Warrios (Wadley); GWP Friends v XI Experience (Workington); Happy Wanderes v Summer field Dynamos ( South Coast Academy); Milford v Rainham Sporting (Umhlathuze Sports Complex); Muzi King Masters v Natal United (Ngcedomhlophe Stadium); uMvoti v Natal Rich Boys (King Edward Park).