UMosimane ufuna isikwibhisi samagoli

UMQEQESHI weMamelodi Sundowns, uPitso “Jingles” Mosimane ukhathazekile ngokwakhiwa kwamathuba kodwa agcine engabenzelanga lutho.

Lo mqeqeshi usekubeke kwacaca ukuthi uthungatha uhlobo lomgadli ongazixaki ngokuningi kepha obhakuzisa inethi.

UMosimane ukusho lokhu ngempelasonto eqeda ukunqoba kwi-USM Alger yase-Algeria ayishaye ngo 2-1 ongakhululekisi kwazise iSundowns yakhe amathuba amaningi kodwa yaphumelela ukushaya amagoli amabili. Ngenxa yalokhu kushweba amagoli, uMosimane ugcine eqeda lo mdlalo ehleli ngesinqe esisodwa kwazise amagoli abebewashayile abebukeka engenele.

Uneme ngabadlali bakhe abakha amathuba kodwa usebonile ukuthi yini edingekayo ukuze kushintshe lesi simo esibhekene neqembu lakhe.

“Ukuyekwa kwamagoli yinkinga ekhona futhi endala. Le nkinga isuka kude kodwa isebholeni laseNingizimu Afrika kuphela, ngakho kufanele ngisebenze ngalokhu okukhona. Ngineme ngoGaston (Sirino), Mshishi (Themba Zwane) kanjalo noVilla (Sibusiso Vilakazi). Bayawashaya amagoli kodwa kwesinye isikhathi umthwalo ubuye ube ngaphezulu kwabo.”

Ubuzwe bukhoma ukuthi njengoba kuvuleke iwindi lokushintshana ngabadlali unazo yini izinhlelo zokuqinisa iqembu lakhe ezindaweni ezithile.

“Ngaso sonke isikhathi umqeqeshi okhaliphile uhlale efuna ukuqinisa. Kimina kulula. Ngidinga umgadli ongazi lutho okunye ngaphandle kokufaka ibhola enethini. Nginabo kakhulu abadlali abahlanganisa izinto, ngishoda ngozoziqedela. Ngizongena emakethe uma ngimthola umgadli onjalo. Angikufihli lokho,” kusho uMosimane.

Lo mqeqeshi ukhuluma kanjena nje, alokhu aheleze njalo amahlebezi okuthi uBradley Grobler ungomunye wabagadli abafunwa yiSundowns. Akuyona yodwa iDowns kwazise ne-Orlando Pirates ilokhu ibalwe njalo namaqembu acathamela lo mgadli owaqhulula masonto wonke amagoli kwiSuperSport United. Baningi abanye abadlali abahlonishwayo abangase bazithole benamakhaya amasha njengoba iwindi selingena esontweni lesibili livulekile. Kulabo badlali kukhona uSiphelele Ntshangase weKaizer Chiefs. Kusukela efikile kwiChiefs akakaze afinyelele ezingeni elimenze wadlala kwiBafana Bafana ekuNFD (GladAfrica Championship). Nokho imenenja kaNtshangase isagcizelela ukuthi uzohlala kuMakhosi.

Omunye wuLucky Mohomi okuyona iSundowns. Kuthiwa angase aphambane no-Aubrey Modiba nemali ingakapheli le nyanga.

UMXOLISI Kunene weMaritzburg United uthembisa ukuthi bazowathela induku AmaZulu FC abazobhekana nawo emdlalweni we-Absa Premiership eHarry Gwala Stadium, eMgungundlovu, kusasa ngo-8 ebusuku

Isithombe: BACKPAGEPIX UBRADLEY Grobler weSuperSport United exinwe uWayne Arendse weMamelodi Sundowns emdlalweni weMTN 8 eLucas Moripe Stadium, e-Atteridgeville ngoSepthemba 18 nyakenye

THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.