Abalingisi balokhu beyishiyile iRhythm City
USHIYWA ngabalingisi umdlalo we-e.tv iRhythm City njengoba ngoMsombuluko ezinkundleni zokuxhumana kuphinde kwavela ukuthi kushiya omunye umlingisi.
Kulo mdlalo ngeledlule kuvele izindaba ezithi uSamkelo Ndlovu, olingisa indawo kaLerato, uyashiya kuwona.
Muva nje kwaphinde kwavela ukuthi u-Amo Chidi, olingisa indawo kaRene naye uyashiya.
Ukushiya kuka- Amo kumangaze abaningi njengoba bekungazwakalanga lutho ohlangothini lwakhe ngokushiya umdlalo.
Kodwa uSamkelo ukhiphe isitatimende lapho abechaza khona ukuthi ubevele efuna ukushiya emdlalweni.
“Sengibe semkhakheni wokulingisa iminyaka engu-12. Sengilingise abantu abahlukene abafikile kwabayishumi kuleli, ngakho kwiRhythm City bese ngithole ikhaya. Isinqumo sami sokushiya kulo mdlalo sisuka ngaphakathi njengoba bekungelula kwazise lo mlingiswa bese nginguyena isikhathi eside.
Manje ngizizwa nginesibindi sokuphuma ngiyobheka izindawo ezintsha engizosebenza kuzona. Ngizoshiya kulo mdlalo ngazi ukuthi ngibenzile ubulungiswa,” kuchaza uSamkelo.
Uthe abalandeli bakhe basazombona kwithelevishini futhi ubonga ozakwabo asebenze nabo kulo mdlalo, abaqhakambise ikhono lakhe.
Kulo mdlalo u-Amo, uzogcina ukubonakala maphakathi no-Ephreli, kuwona ubesehlale iminyaka eyisishiyagalolunye.
UZiyanda Mngomezulu wakwa-e.tv, uthe bafisela uSamkelo no-Amo konke okuhle kulo mkhakha abakuwona.
Uthe ukuzinikela kwabo kulo mdlalo ngeke bakukhohlwe futhi bayababonga ngakho konke abakwenzile ukujabulisa ababukeli balo mdlalo.
Kuwona lo mdlalo kusanda kushiya inkakha yomlingisi, uJames Bartlett, obelingisa indawo kaDavid Genaro.