Kubulewe unogada esikoleni
KUPHOQELEKE ukuthi abafundi babuyiselwe emakhaya emuva kokufica isidumbu sikanogada esikoleni ngoMsombuluko.
Abafundi nothisha baseButhathu’bunye High, eMhlabashane, eHighflats, bazithele esidunjini sikaMnuz Vusumuzi Ncobela (58) obewunogada esikoleni sinamanxeba okudutshulwa.
Kusolwa ukuthi uNcobela, obegadile esikoleni ngeSonto ebusuku, uhlaselwe ngumuntu noma ngabantu bamdubula wafa. Isidumbu sakhe sitholakale eduze kwamathoyilethi esikole. Bekubonakala sengathi ubebaleka wawa washonela eduze kwamathoyilethi.
Ayiqondakali imbangela yokudutshulwa kwakhe ngoba akukho okuntshontshiwe esikoleni nakuyena. Zonke izinto abeziphethe bezikuye, ngisho neselula. Kusolwa ukuthi udutshulwe ngeSonto ebusuku kodwa isidumbu size satholakala ekuseni sekufike othisha nabafundi. Umthombo osondelene nesikole uthe abafundi bebethukile bengakwazi nokufunda ngoba imoto ethwala izidumbu beyingakafiki ngesikhathi befika esikoleni. “Kuphoqeleke ukuthi othisha babadedele abafundi babuyele emakhaya ngoba bebethukile bengakwazi ukufunda. Akekho owaziyo ukuthi umufi udutshulwe ngasikhathi sini, ukuthi bebebengaki nabantu abafike bazomhlasela. Okwenza ukuthi kube novalo kakhulu wukuthi akukho okuthathiwe esikoleni noma kuye umufi, manje akuqondakali ukuthi ubulawelweni,” kusho umthombo.
UMnuz Kwazi Mthethwa, okhulumela uMnyango wezeMfundo KwaZulu-Natal, uthe udaba lokuphepha ezikoleni seludinga ukuthi umphakathi ungenelele ukuze kuvikelwe izikole.
“Siwumnyango sisodwa ngeke sikwazi ukuyinqoba impi yobugebengu obenzeka ezikoleni. Sekudingeka ukuthi umphakathi ubambe iqhaza. Abantu abenza ubugebengu ezikoleni baphuma kuwo umphakathi ngakho siyakholwa ukuthi uma ungabambisana nathi lesi sihlava sokubulawa konogada singanqontshwa,” kusho uMthethwa.
Imizamo yokuthola umndeni yehlulekile ngoba kuthiwa umufi ubehlala yedwa emzini wakubo.