Bafuna ubulungiswa ngendodana ebulewe
UMNDENI womfundi oneminyaka engu-17 waseMawoti, eNanda, ufuna ubulungiswa ngokubulawa kwakhe ngesihluku, ehudulwa emgwaqweni ngentambo. UThabiso Matola (17), obefunda uGrade 11, wabulawa ngokushaywa waze wahudulwa emgwaqweni ngabasolwa.
Lesi sigameko sokushaywa kwakhe senzeka ngoFebhuwari 1 nonyaka, washona ngoFebhuwari 4 esibhedlela. Izolo abasolwa bebevele eNkantolo yeMantshi yaseNtuzuma ngaleli cala. Icala libe selihlehliselwa u-Mashi 11 nonyaka ukuze abasolwa bezofaka isicelo sebheyili. Unina walo mfundi, uNksz Nobuhle Matola, uthe abafisi abasolwa bededelwe ngebheyili njengoba bekholelwa ukuthi bayingozi.
“Siwumndeni asifisi abasolwa bephume ejele ngenxa yobuhlungu esibhekene nabo nesihluku okubulawe ngaso indodana yami. Siyakholelwa nokuthi umphakathi uzoba sengozini ngenxa yalaba bantu,” kusho uNksz Matola.
Elandisa Isolezwe, uthe indodana yakhe yayiya esitolo ebusuku iyothenga ngesikhathi ihlangana nabasolwa abazitshela ukuthi ingomunye umfana ohlala emgwaqweni owodwa nayo.
“Indodana yami bayibuza ukuthi ingabe inguyena lowo mfana ababemfuna. Ithe iphika yabe isishaywa yaze yagwazwa. Indodana yami yakwazi ukuza ekhaya yafike yabika. Umama nomunye bahamba beyofuna imoto ezoyihambisa esibhedlela. Babuya indodana yami ingasekho, sebeyilande endlini. Bayihudula emgwaqweni beyifake intambo. Baqhubeka beyishaya baze bayigwaza. Yashona esibhedlela emuva kwezinsuku,” kusho uNksz Matola. Uthe bewumndeni bayesaba njengoba bengazi noma bakhona yini abanye abantu abathinteka ekubulaweni kwendodana yakhe.
Ngokuthola kweSolezwe, umfana owayefunwa ngabasolwa ubesolwa ngokuntshontsha impahla komunye umuzi endaweni.
Okhulumela amaphoyisa KwwaZulu-Natal, uColonel Thembeka Mbele, uthe amaphoyisa aseNanda aphenya icala lokubulala. “Umfana oneminyaka engu-17 wagwazwa eMawoti, wayiswa esibhedlela wafika washona. Wayenamanxeba umzimba wonke. Kwaboshwa abasolwa ababili abaneminyaka engu-20 no-22, babhekene necala lokubulala. Sebevelile enkantolo, uphenyo lusaqhubeka,” kusho uCol. Mbele.