Udedeliwe umakhelwane kwelokufa kwentombi nto
UBABEKAZI wentombi nto edlwengulwe yabulawa KwaMolefe, eNquthu, ngoMgqibelo, uthe umsolwa oboshiwe wazivumela ngokwakhe ukuthi wuyena obulele.
UNksz Jabu Buthelezi, uthe umsolwa ona-35 ongumzala kaNksz Nomvula “Juba” Buthelezi wafika ezoqalaza ukuthi kwenzakani egunjini okwakubulawe kulona umufi.
“Umsolwa uqhamuke wazozibhekisa, ezenza umuntu ongazi lutho. Kuthe uma ephonswa imibuzo ngegazi elaligcwele ebhulukweni ayeligqokile, wagcina evumile ukuthi wuyena odlwengule wabulala uJuba. Ubizelwe amaphoyisa ambopha,” kusho uNksz Buthelezi.
Umsolwa uvele eNkantolo yeMantshi yaseNquthu ngecala lokubulala. Icala lihlehliselwe uMashi 4 ukuze afake isicelo sebheyili.
Amaphoyisa athe azolinda umphumela wokuhlolwa kwesidumbu okuyiwona ozocacisa ngembangela yokufa kukaNksz Buthelezi.
Umsolwa uboshwe ngeSonto ekuseni, kwathi ngoMsombuluko kwaboshwa owesilisa ongumakhelwane odedelwe ntambana ngalo lolo suku ngoba amaphoyisa ethe akayamaniseki naleli cala.
Ngobusuku besigameko kuthiwa umsolwa ubonwe ngunina egqoke ibhulukwe ebeligcwele igazi ngaphambili kodwa wanganaka ngoba ubezitshela ukuthi mhlawumbe ubelwa wathelwa yigazi njengoba bekunomcimbi
UNksz Buthelezi ulandise ngokwenzeka, ethi kwakubuswa emndenini ngoMgqibelo kunomcimbi wokugcagcelwa kwelungu lomndeni kwayise omncane endaweni.
Uthe ebusuku ngabo-9 emva komcimbi umufi uhambe namalungu omndeni amabili, baya esitolo.
“Babuye bahlukana ngezindlu abalala kuzona, kwathi uJuba eseya egunjini alala kulona nonina wahlaselwa wumsolwa owamklinya wabe esemhudulela endlini engurawondi, wafike wambeka embhedeni maqede wamdlwengula kuyona wabe esembulala,” kusho uNksz Buthelezi.
Uthe ngeSonto ekuseni ngo-9 uJuba wayengabonwa emagcekeni akwabo, baqala bamthungatha bengamtholi.
“Abangena endlini engurawondi bamfica elalise okomuntu ozunywe wubuthongo, kwathi uma besondela eduze babona igazi emlonyeni nasemakhaleni enganyakazi.
Uma bembula ingubo, isipontshi sasibomvu tebhu yigazi engagqokile ngezansi. Kwaqhuma isililo kwabizwa abadala emndenini, kwashayelwa namaphoyisa.
Ngagcina sengiziyela ngokwami esiteshini ngiyowalanda ngenxa yokubona ukuthi kuhamba isikhathi amaphoyisa awafiki,” kusho uNksz Buthelezi.
Ngaleso sikhathi kuthiwa umsolwa wayemdibi munye nabantu ababekhungathelike.
UNksz Buthelezi uthe umsolwa wesibili uboshwe ngoba kwatholakala ikepisi lakhe endlini okwakudlwengulwe kuyona umufi, okugcine sekuvela ukuthi wayeliboleke umsolwa.