Uzobuya isibili umdlalo i-Agent weSABC1
UKHUZA ibuya umdlalo i-Agent kwiSABC1 obophele abalingisi, okukhona kubo uKay Sibiya noSisanda Henna.
Lo mdlalo uzoqala ukubonakala ngoMashi 8, ngo-9.30 ebusuku.
Isizini yokuqala yawo iqale ukukhonjiswa ngonyaka odlule. Ukhuluma ngomdlali webhola owalimala kanzima, okwaphoqa ukuthi ashiye.
Ugcina ngokuzivulela i-agency yakhe esiza intsha esakhula, efuna ukuba ngabadlali abakhulu emkhakheni webhola.
UKay ulingisa indawo kaSlindile “Blaze” Magoba, kuthi uSisanda Henna alingise ekaLesego “Ace” Moleko.
UPhillip Mabitsela wakwaSABC1, uthe bajabule ukwethulela abantu bakuleli isizini yesibili yalo umdlalo njengoba wenza kahle kakhulu uqala ukubonakala.
“Lo mdlalo ugxila kulaba balingisi ababili, omunye njengoba ephethe umdlali ohamba phambili eqenjini lakhe futhi ohlonishwayo ngisho ezweni langakubo.
Inkinga yakhe wukuthi uyazikhukhumeza futhi akazi ukuthi kumele enze izinto agcine kuphi njengoba ezibona ephethe wonke umuntu asebenza naye.
Ungomunye wabaphethwe wuBlaze kodwa yize emngenisela imali eningi kodwa umphathisa ngekhanda njengoba engena ezinkingeni usuku nosuku,” kuchaza uPhillip.
Uthe kuningi okuzokwenzeka okuzojabulisa abantu njengoba iningi labalingisi libuyile, bekhona nabasha.
“Kule sizini sobona umlingisi u-Anthony Oseyemi, yena ozolingisa indawo kaChristopher Kilembe ongummeli onamava nodumile, ojwayele ukumela abadlali, naye indawo ayilingisayo ngeyomuntu ongenazwelo kodwa owazi kahle umsebenzi wakhe.
Ngakho-ke abantu mabalindele enye isizini ezobashiya bebambe ongezansi,” kuchaza uPhillip.
Uthe umdlalo uqoshwe eGoli, uveza izikhathi zamanje uphinde uveze okwakwenzeka ngeminyaka ka-1970.
Abanye babalingisi abakhona kubalwa uPamela Nomvete (Godi Zulu), Zweli Dube (Phumlani Mbebe), Tarryn Wyngaard (Nathalie), Thabelo Malema